მთავრობა GM Pharma-სთვის 14,000 მ²-ის ექსპროპრიაციით ჩამორთმევას გეგმავს|მიზეზი თბილისი-რუსთავის მაგისტრალის მშენებლობაა

საქართველოს მთავრობა, ქვეყნის ერთ-ერთი უმსხვილესი ფარმაცევტული საწარმოსთვის - GM Pharma-სთვის 14,031 კვ.მ. მიწის ნაკვეთის ექსპოპრიაციის გზით ჩამორთმევას გეგმავს - შესაბამისი ბრძანება ეკონომიკის მინისტრმა, მარიამ ქვრივიშვილმა 29 მაისს გამოსცა.

ბრძანების თანახმად, ექსპროპრიაცია თბილისი-რუსთავის მაგისტრალის მშენებლობას უკავშირდება. მიწის ნაკვეთი, რომლის ჩამორთმევასაც მთავრობა გეგმავს მდებარეობს რუსთავის გზატკეცილის 52 ნომერში, სადაც GM Pharma-ს 151,117 კვადრატული მეტრის მიწის ნაკვეთი ეკუთვნის, საიდანაც 14,031 კვადრატული მეტრის ექსპროპრიაცია იგეგმება.

მუნიციპალური განვითარების ფონდის მიერ მომზადებული პროექტის მიხედვით, მაგისტრალმა უნდა გადაკვეთოს GM Pharma-ს საკუთრებაში ამჟამად არსებული ტერიტორია. რენდერის მიხედვით, მაგისტრალი ფარმაცევტული საწარმოდან რამდენიმე მეტრის დაშორებით განთავსდება.

BMG-მ GM Pharma-ს კითხვით მიმართა გაასაჩივრებს თუ არა კომპანია ეკონომიკის მინისტრის ბრძანებას, თუმცა ჯერჯერობით, პასუხი არ მიგვიღია.

თბილისი-რუსთავის დამაკავშირებელი მაგისტრალის განახლებული მარშრუტი:

მაგისტრალის არსებულ მონაკვეთთან დაერთების სქემა - მარჯვნივ "ჯი ემ ფარმას" საწარმო:

თბილისი-რუსთავის მაგისტრალის დარჩენილი მონაკვეთი:

თბილისი-რუსთავის დამაკავშირებელი მაგისტრალის მშენებლობა 2019 წელს თავდაპირველი პროექტის ხარვეზების და ქვემო ფონიჭალის მოსახლეობის პროტესტის გამო შეწყდა. პირვანდელი პროექტით მაგისტრალს მტკვრის მარჯვენა სანაპიროზე, ქვემო ფონიჭალაში უნდა გაევლო, თუმცა საცხოვრებელი ზონიდან გზის 50 მეტრზე ნაკლები დაშორების და სხვა ფაქტორების გამო მოსახლეობამ მისი შეჩერება მოითხოვა.

თბილისი-რუსთავის მაგისტრალის პროექტი 2014 წელს, მუნიციპალური განვითარების ფონდის მიერ დაიწყო და აზიის განვითარების ბანკის დაფინანსებით ხორციელდებოდა. გზის პირველი და მესამე მონაკვეთების მშენებლობა დასრულებულია. სამუშაოებზე 184 მლნ ლარი უკვე დაიხარჯა.