NATO-ს სარდალი: ევროპა Palantir-ის სამხედრო ტექნოლოგიაზეა დამოკიდებული

"ჩრდილოატლანტიკურ ალიანსს Palantir-ის ხელოვნურ ინტელექტზე დაფუძნებული სამხედრო ტექნოლოგიის ალტერნატივა არ აქვს" - განაცხადა ტრანსფორმაციის მიმართულებით NATO-ს უმაღლესმა სარდალმა, ადმირალმა პიერ ვანდიემ.

მისი თქმით, ევროპამ ბევრად უფრო სწრაფად უნდა იმოქმედოს, თუ აშშ-ის თავდაცვის ტექნოლოგიებზე დამოკიდებულების შემცირება სურს.

მაღალჩინოსანმა გაიხსენა Palantir-თან დადებული კონტრაქტიც, რომელიც ალიანმსა რეკორდულ დროში, 6 თვეში გააფორმა. მიზეზი კი ის გახდა, რომ NATO-ს მონაცემების დამუშავების, დაზვერვისა და სამხედრო დაგეგმარებისთვის უკეთესი ალტერნატივა არ გააჩნდა.

როგორც გაირკვა, პროგრამული უზრუნველყოფა, რომელიც ამერიკულმა დაზვერვითმა კომპანიამ ნიდერლანდებში, NATO-ს გაერთიანებული ძალების ბრუნსუმის სარდლობასა და ბელგიაში, ევროპაში მოკავშირეთა უმაღლეს შტაბ-ბინაში უკვე დააინსტალია, ყველაზე ეფექტურად ახერხებს სამხედრო საჭიროებების დაკმაყოფილებას.

NATO-ს სარდალი POLITICO-სთან საუბრისას აღნიშნავს, რომ ამ შესყიდვამ ევროპაში ამერიკულ თავდაცვის ტექნოლოგიებზე დამოკიდებულება განუზომლად გააღრმავა და გააჩინა სერიოზული რისკები, განსაკუთრებით კი იმ ფონზე, როდესაც დონალდ ტრამპის ადმინისტრაცია ალიანსის დატოვებით მუდმივად იმუქრება.