ნიდერლანდების ცენტრალურმა ბანკმა 86 ტონა ოქრო აშშ-დან და კანადიდან დიდ ბრიტანეთში გადაიტანა

ნიდერლანდების ცენტრალურმა ბანკმა აშშ-დან და კანადიდან 86 ტონა ოქრო დიდ ბრიტანეთში გადაიტანა. როგორც ირკვევა, მარტიდან აგვისტომდე პერიოდში DNB-მ ნიუ-იორკსა და ოტავაში არსებული საკუთარი ოქროს მარაგის მეოთხედზე მეტი ბრიტანეთის დედაქალაქში გადაზიდა.

ინსტიტუტმა ეს გადაწყვეტილება მზარდი გეოპოლიტიკური რყევების გათვალისწინებით მიიღო. როგორც ფინანსურ ორგანოში განმარტავენ, ახალი სტრატეგია მიზნად კრიზისებისადმი მზადყოფნის გაძლიერებას ისახავს. ცენტრალური ბანკის შეფასებით, მძიმე კრიზისის პირობებში ჩრდილოეთ ამერიკაში განთავსებული ზოდების პირდაპირ და სწრაფად გამოყენება შეუძლებელი იქნებოდა.

მნიშვნელოვანია ითქვას, რომ გადატანილი ოქრო ინგლისის ბანკის საცავებში განთავსდა. ბრიტანეთის მთავარ ფინანსურ ინსტიტუტში დაცული ზოდები საერთაშორისო სტანდარტებს აკმაყოფილებს და ბაზარზე "ყველაზე მარტივად სავაჭრო ოქროდ" მიიჩნევა. DNB-ის მმართველმა ოლაფ სლეიპენმა განმარტა, რომ ამ გადაწყვეტილებამ ოქროს რეზერვების ლიკვიდურობა საგრძნობლად გაზარდა.

სლეიპენის თქმით, მართალია, ინსტიტუტი მარაგების გამოყენებას არ ელის, თუმცა კრიზისული მედეგობის ამაღლება აუცილებელი იყო. ამ ნაბიჯის შედეგად, ცენტრალურ ბანკში ოქროს რეზერვების გეოგრაფიული განაწილება "უფრო დაბალანსებული" გახდა. ამჟამად ლონდონი რეზერვების 32.1%-ს ინახავს, ზეისტში მდებარე ცენტრი - 30.8%-ს, ხოლო ნიუ-იორკსა და ოტავაზე 18.5%-იანი წილები მოდის.