Nike-თან ხანგრძლივი პარტნიორობის შემდეგ კილიან მბაპე On-ის საფეხბურთო ბუცების მთავარი სახე გახდა
„რეალ მადრიდის“ თავდამსხმელმა კილიან მბაპემ Nike-თან ხანგრძლივი თანამშრომლობა დაასრულა და შვეიცარიული კომპანია On-ის ახალი საფეხბურთო მიმართულების მთავარი სახე გახდა. კომპანია პირველად შედის საფეხბურთო ბუცების ბაზარზე და ამ ნაბიჯით სპორტული ინდუსტრიის ერთ-ერთ ყველაზე კონკურენტულ სეგმენტში მნიშვნელოვან გამოწვევას ახორციელებს.
On წლების განმავლობაში პრემიუმ კლასის სარბენი ფეხსაცმლით იყო ცნობილი, მოგვიანებით კი ჩოგბურთშიც გაფართოვდა. 2019 წელს კომპანიას ლეგენდარული ჩოგბურთელი როჯერ ფედერერი შეუერთდა, რომელმაც თანამშრომლობის ფარგლებში კომპანიის წილიც მიიღო. დღეს On-ის სპორტსმენებს შორის არიან აშშ-ის ღია პირველობის ფინალისტი ბენ შელტონი და ექვსგზის „დიდი სლემის“ ჩემპიონი იგა შვიონტეკი.
თუმცა ფეხბურთში შესვლა კომპანიის ისტორიაში, შესაძლოა, ყველაზე ამბიციური ნაბიჯია. გაფართოების ფარგლებში On-მა საფრანგეთისა და „არსენალის“ ყოფილი ვარსკვლავი ტიერი ანრიც დაიქირავა. ის კომპანიის ფეხბურთის მიმართულების დირექტორია და ამ პოზიციაზე, ოფიციალურ განცხადებამდე, 2025 წლიდან მუშაობდა. სწორედ ანრიმ ითამაშა მნიშვნელოვანი როლი მბაპეს On-ში გადასვლის პროცესში.
27 წლის ფრანგმა ფეხბურთელმა ამ გადაწყვეტილებით არა მხოლოდ Nike-ს, არამედ ბაზრის სხვა უმსხვილეს ბრენდებსაც, მათ შორის Adidas-სა და Puma-ს, გვერდი აუარა. საფეხბურთო ბუცების ბაზარზე კი On-ის ახალი კონკურენტული ძალა იქნება New Balance-ისა და Skechers-ისთვისაც.
მბაპესა და On-ის შეთანხმების ფინანსური პირობები არ გასაჯაროებულა, თუმცა ცნობილია, რომ ფეხბურთელმა შვეიცარიულ კომპანიაში წილი მიიღო. ეს კი პარტნიორობას ჩვეულებრივ სარეკლამო კონტრაქტზე უფრო ფართო ხასიათს აძლევს.
On-ის განცხადებით, მბაპე კომპანიის საფეხბურთო მიმართულების განვითარებაში უშუალოდ იქნება ჩართული. ის იმუშავებს პროდუქტის შემქმნელებთან, მონაწილეობას მიიღებს ახალი საფეხბურთო ფეხსაცმლისა და სპორტული ტანსაცმლის შექმნასა და ტესტირებაში და კომპანიის გლობალური ელჩის ფუნქციასაც შეასრულებს.
თავად მბაპეს თქმით, On-ში გადასვლის მთავარი მოტივაცია ახალი შესაძლებლობის შექმნა იყო — ფეხბურთში სრულიად ახალი პროდუქტისა და იდეების ჩამოყალიბება. ფეხბურთელს სურს საკუთარი გამოცდილება ახალი ბუცებისა და სპორტული პროდუქციის განვითარებას მოახმაროს.
On-ის დამფუძნებლის, დევიდ ალემანის განცხადებით, კომპანიის პირველი საფეხბურთო ბუცები საცალო ბაზარზე 2027 წელს გამოჩნდება და პრემიუმ სეგმენტში იქნება პოზიციონირებული. კომპანია ასევე განსაკუთრებულ ყურადღებას ქალთა ფეხბურთს უთმობს და გეგმავს, ქალთა მსოფლიო ჩემპიონატის წინ ამ მიმართულებითაც გააქტიურდეს.
BM.GE
წყარო: bm.ge