Nvidia ტაივანში ყოველწლიურად $150 მილიარდის ინვესტიციას ჩადებს

ამერიკული ტექნოლოგიური გიგანტის, Nvidia-ს გენერალურმა დირექტორმა, ჯენსენ ჰუანგმა ტაივანში ყოველწლიურად დაახლოებით $150 მილიარდის ინვესტირების გეგმა წარადგინა. კომპანიის ხელმძღვანელმა ეს განცხადება ტაიბეიში ახალი სათავო ოფისის პრეზენტაციაზე გააკეთა. ჰუანგმა დასახელებული რეგიონი ხელოვნური ინტელექტის რევოლუციის „ეპიცენტრად“ მოიხსენია და აღნიშნა, რომ კუნძული გლობალური ტექნოლოგიური წარმოების ცენტრად ხანგრძლივი დროით დარჩება.

რაც შეეხება თავად ახალ სათავო ოფისს, რომლის პრეზენტაციაზეც ჰუანგმა კაპიტალური დანახარჯების მნიშვნელოვანი ზრდა დააანონსა, მისი მშენებლობა მიმდინარე წელს დაიწყება და ის სრულფასოვნად 2030 წელს ამოქმედდება. როგორც Nvidia-ში აცხადებენ, ეს შენობა ამერიკულ გიგანტს უფრო მეტად დააახლოებს იმ პარტნიორთან, რომელიც ხელოვნური ინტელექტის სისტემებისთვის მოწინავე ნახევარგამტარებს აწარმოებს. საუბარია TSMC-ზე, რომელიც Nvidia-ს ძირითად მომწოდებლად მიიჩნევა.

საყურადღებოა, რომ ბოლო წლებში კომპანიამ კაპიტალური დანახარჯები მკვეთრად გაზარდა. თუ რამდენიმე წლის წინ Nvidia რეგიონში ყოველწლიურად მხოლოდ $10 მილიარდიდან $15 მილიარდამდე აბანდებდა, ამჯერად მაჩვენებელმა $100 მილიარდს გადააჭარბა. უახლოეს პერიოდში კი დანახარჯების $150 მილიარდამდე გაზრდა იგეგმება.

ცნობისთვის, Nvidia ამერიკული გიგანტია, რომელიც ხელოვნური ინტელექტის მიმართულებით მოწინავე ჩიპების წარმოების ლიდერად მიიჩნევა.