Oktopus-ი ახალი ფილიალის გახსნას საბურთალოზე გეგმავს|დეტალები

სპორტული კომპლექსების ქსელი Oktopus Fitness Club გაფართოებას აგრძელებს. კომპანიის მმართველმა პარტნიორმა გიორგი ასათიანმა BM.GE-სთან ინტერვიუში განაცხადა, რომ ახალი ფილიალი სავარაუდოდ 2026 წლის ბოლოს ან 2027 წლის დასაწყისში გაიხსნება.

მისი თქმით, ახალი სივრცე საბურთალოზე, Biograph-ის პროექტ „საკენში“ განთავსდება და არსებული ფილიალებიდან ყველაზე მასშტაბური იქნება. კომპლექსი დატვირთული იქნება საცურაო აუზითა და უახლესი სავარჯიშო ტრენაჟორებით.

"ახალ ფილიალს სავარაუდოდ ან წლის ბოლოს, ან 2027 წლის დასაწყისში გავხსნით, რომელიც თბილისში იქნება ყველაზე დიდი სავარჯიშო სივრცე დღეს არსებულებს შორის. 2500 კვ.მ-ზე იქნება გაშლილი 25-მეტრიანი საცურაო აუზით", - განაცხადა გიორგი ასათიანმა.

რა ინვესტიციით გაიხსნება ობიექტი და რა ეღირება, ამ და სხვა დეტალების გაჟღერებისგან კომპანია ჯერჯერობით თავს იკავებს.

ამ დროისთვის Oktopus Fitness Club ჯამში 6 ფილიალს აერთიანებს, მათგან ერთი ბათუმში ფუნქციონირებს. კომპანიის ოფიციალური ვებგვერდის მიხედვით, ერთთვიანი აბონემენტის ღირებულება, რომელიც 5-დღიან დაპაუზებასაც მოიცავს, 195-დან 655 ლარამდე მერყეობს და კონკრეტულ ფილიალზეა დამოკიდებული. საგულისხმოა, რომ კომპანიამ სულ ცოტა ხნის წინ საკუთარი საკვები დანამატი გამოუშვა, რომელიც გერმანიაში იწარმოება, ხოლო ბაზარზე Oktopus Nutrition-ის სახელით იყიდება. მისი ღირებულება ოფიციალურ ვებგვერდზე 145 ლარია.