ომის გამო, Shell-ის, BP-ისა და TotalEnergies-ის შემოსავლები გაიზარდა

ევროპულმა ნავთობკომპანიებმა მიმდინარე წლის პირველ კვარტალში მოგება, გასული წლის ბოლო პერიოდთან შედარებით, $4.75 მილიარდამდე გაზარდეს. კერძოდ, Shell-ის, BP-ისა და TotalEnergies-ის ჯამური შემოსავლები, ომით გამოწვეული მაღალი ვოლატილობის შედეგად, მკვეთრად გაიზარდა.

როგორც ირკვევა, ენერგორესურსებზე ფასების მკვეთრმა მატებამ და ბაზრის არასტაბილურობამ ევროპულ კომპანიებს საშუალება მისცა, სავაჭრო ოპერაციების ხარჯზე ამერიკულ კონკურენტებზე უკეთესი მაჩვენებლები დაეფიქსირებინათ.

მნიშვნელოვანია ითქვას, რომ სავაჭრო მიმართულებით მიღებულმა რეკორდულმა მოგებამ ევროპული გიგანტებისთვის ახლო აღმოსავლეთში ნავთობის მოპოვების შემცირებით გამოწვეული ზარალი სრულად დააბალანსა.

Shell-ის მიერ გასულ კვირას გამოქვეყნებული ანგარიშით დასტურდება, რომ კომპანიის ფინანსური შედეგები ანალიტიკოსების პროგნოზს მნიშვნელოვნად აჭარბებს. აღნიშნული ზრდა ნავთობპროდუქტებზე რეალიზებული ფასების მატებასა და უპრეცედენტო საბაზრო ვოლატილობის პირობებში გააქტიურებულ ვაჭრობას უკავშირდება.

რაც შეეხება სხვა მსხვილ მოთამაშეებს, BP-მ პირველ კვარტალში მოგება გასული წლის ანალოგიურ პერიოდთან შედარებით გააორმაგა. პარალელურად, ფრანგულმა TotalEnergies-მა კვარტალური მოგების 30%-იანი ზრდის შესახებ განაცხადა და შუალედური დივიდენდი 6%-ით გაზარდა.