Paramount-ის შემოსავალმა $7.35 მილიარდს მიაღწია

კინოინდუსტრიის ამერიკული გიგანტის, Paramount Skydance-ის პირველი კვარტალის ფინანსურმა მაჩვენებლებმა ანალიტიკოსების მოლოდინს გადააჭარბა.

კომპანიის შემოსავალმა ბოლო 3 თვეში $7.35 მილიარდი შეადგინა. აღსანიშნავია, რომ ეს მონაცემი პროგნოზირებულ $7.28 მილიარდს აღემატება. თითო აქციაზე კორექტირებულმა მოგებამ $0.23 ცენტი შეადგინა, მაშინ როცა უოლ-სტრიტის ანალიტიკოსები $0.15 ცენტს მოელოდნენ. აქვე ისიც უნდა ითქვას, რომ გასული წლის ანალოგიურ პერიოდში შემოსავალი 2%-ით ნაკლები იყო, ამჯერად კი ზრდა სტრიმინგის სექტორმა განაპირობა.

ცნობისთვის, აღნიშნული მიმართულებით შემოსავალი 11%-ით გაიზარდა და $2.4 მილიარდს მიაღწია. როგორც ირკვევა, Paramount+-ის გამომწერი კიდევ 700,000 ადამიანი გახდა. აღსანიშნავია, რომ ამჟამად პლატფორმას სულ 80 მილიონამდე მომხმარებელი ჰყავს. გაუმჯობესება ფიქსირდება კინოსტუდიის მიმართულებითაც, სადაც შემოსავალი 11%-ით გაიზარდა და $1.28 მილიარდი შეადგინა. ფილმების სექტორში წარმატება ფილმმა "კივილი 7" განაპირობა.

Paramount-ის ხელმძღვანელობამ წლის სრული ფინანსური პროგნოზი ამჯერად უცვლელად დატოვა. როგორც ირკვევა, კომპანია ფისკალურ 2026 წელს $30 მილიარდის ოდენობის შემოსავალს ელოდება. საოპერაციო მოგებამ კი $3.8 მილიარდს უნდა მიაღწიოს.

შეგახსენებთ, რომ Paramount Skydance-ი მსოფლიოს ერთ-ერთი უმდიდრესი ადამიანის, ლარი ელისონის შვილს, დევიდ ელისონს ეკუთვნის. აღსანიშნავია, რომ ამჟამად კომპანია კინოინდუსტრიის გიგანტის, Warner Brothers Discovery-ს შესყიდვის პროცესშია. გარიგება საბოლოოდ 2026 წლის მესამე კვარტალში ჩაიხურება და PS-ს $108 მილიარდზე მეტი დაუჯდება.