პარლამენტმა „ნარჩენების მართვის კოდექსში“ ცვლილებები მიიღო – ბიზნესისთვის ჯარიმები მკაცრდება

საქართველოს პარლამენტმა გარემოს დაცვისა და სოფლის მეურნეობის სამინისტროს მიერ მომზადებული კანონპროექტი დაამტკიცა. „ნარჩენების მართვის კოდექსში“ შესული ცვლილებები მიზნად ისახავს გარემოსდაცვითი ზედამხედველობის გაძლიერებას და ბიზნესსექტორისთვის (მწარმოებლებისთვის) ახალი, მკაცრი ფინანსური სანქციების დაწესებას.

ცვლილებები ძირითადად ეხება მწარმოებლის გაფართოებული ვალდებულების (მგვ) მოთხოვნების არაჯეროვან შესრულებას.

კანონი მნიშვნელოვნად აზუსტებს და ამკაცრებს სანქციებს მგვ-ის ფარგლებში მომუშავე სუბიექტებისთვის:

• რეგისტრაციის გარეშე საქმიანობა: 10 ტონამდე არასახიფათო ნარჩენის განთავსება შესაბამისი რეგისტრაციის გარეშე გამოიწვევს დაჯარიმებას 1 500 ლარის ოდენობით. მგვ-ის რეესტრში რეგისტრაციის გარეშე საქმიანობისთვის კი ჯარიმა 5 000 ლარით განისაზღვრა. • ანგარიშგების დარღვევა: ანგარიშგებასთან დაკავშირებული მოთხოვნების შეუსრულებლობა, არასწორი ან არასრული ინფორმაციის წარდგენა 2 000 ლარით დაჯარიმდება. • სამოქმედო გეგმის უქონლობა: მგვ-ის ორგანიზაციებისთვის კანონმდებლობით დადგენილ ვადაში შეთანხმებული სამოქმედო გეგმის არქონა 10 000-ლარიან სანქციას ითვალისწინებს. • დისტრიბუტორების პასუხისმგებლობა: ტექნიკური რეგლამენტების მოთხოვნების დარღვევა დისტრიბუტორებისთვის 2 000-ლარიან ჯარიმას გამოიწვევს.

მიღებული ცვლილებების მთავარი მიზანი მწარმოებლებისა და დისტრიბუტორების მხრიდან ვალდებულებების კეთილსინდისიერი შესრულების უზრუნველყოფაა. გარდა ამისა, კანონი არეგულირებს ნარჩენების დროებითი შენახვის ვადებს ისეთი კატეგორიებისთვის, როგორიცაა კატალიზატორები, აზბესტი, ნაცარი და წიდა.

განსაკუთრებული ყურადღება ეთმობა ავტომობილებიდან კატალიზატორების ამოღებისა და ექსპორტის პრევენციას. ვინაიდან კატალიზატორების ექსპორტის აკრძალვა 2026 წლის 1 მაისამდეა ძალაში, ახალი კანონი ხსნის მანამდე არსებულ ბარიერებს მათი დროებითი შენახვის ვადებთან დაკავშირებით.