პაველ ჰერჩინსკის საქართველოში EU-ს ელჩის მანდატი გაუხანგრძლივდა
პაველ ჰერჩინსკის საქართველოსი ევროკავშირის ელჩის მანდატი გაუხანგრძლივდა. ამის შესახებ ინფორმაცია BMG-ს საქართველოში ევროკავშირის წარმომადგენლობამ დაუდასტურა.
საქმე ისაა, რომ პოლონელი დიპლომატი საქართველოში ევროკავშირის ელჩად სტანდარტული 4-წლიანი ვადით 2022 წლის სექტემბერში დაინიშნა და შესაბამისად, მისი მანდატი 2026 წლის შემოდგომაზე იწურება.
დღეს, „ფორმულამ” წყაროზე დაყრდნობით გაავრცელა ინფორმაცია, რომ ევროკავშირმა პაველ ჰერჩინსკის მანდატი გაუხანგრძლივა, რასაც ევროკავშირის წარმომადგენლობა ადასტურებს.
აღსანიშნავია, რომ მანდატის გახანგრძლივება ავტომატურად კიდევ 4 წლით არ ხდება. ვინაიდან ოფიციალური სამართლებრივი გადაწყვეტილება საჯაროდ გამოქვეყნებული არ არის, ამ ეტაპზე უცნობია, რა ვადით დარჩება პაველ ჰერჩინსკი ელჩად საქართველოში.
შეგახსენებთ, პაველ ჰერჩინსკიმდე საქართველოში ევროკავშირის ელჩი იყო შვედი დიპლომატი კარლ ჰარცელი. ის ამ პოზიციას 4 წლის განმავლობაში, 2018 წლიდან 2022 წლის აგვისტომდე იკავებდა.
BM.GE
წყარო: bm.ge