პენსიის სახით 160 მლნ ლარია განაწილებული - ვის შეუძლია ფონდიდან პენსიის გატანა

საპენსიო ფონდის მიერ პენსიის სახით ამ ეტაპზე 160 მლნ ლარია განაწილებული. როგორც „საქმის კურსთან“ საპენსიო ფონდის გენერალური დირექტორის მოვალეობის შემსრულებელმა გიორგი ჭიჭინაძემ განმარტა, პენსია რამდენიმე კატეგორიის პირზე გაიცემა.

კერძოდ, ფონდიდან პენსიის მიღება შეუძლია შშმ პირს, პირს, რომელმაც საპენსიო ასაკს, მემკვიდრეებს და პირს, რომელიც ქვეყანას ტოვებს.

„დღეის მონაცემებით 99% ერთიანი გატანით არის გაცემული საპენსიო აქტივები და დაახლოებით 32 პირზე ფიქსირდება პროგრამული გატანით პენსიის მიღება. ძალიან დიდი მომართვიანობაა ყოველდღე. არიან კატეგორია პირების, რომლებსაც აქვთ დანაზოგი, არიან საპენსიო ასაკის, მაგრამ რჩებიან საპენსიო ფონდის სისტემაში“, - განმარტავს გიორგი ჭიჭინაძე.

აღსანიშნავია, რომ საპენსიო ფონდში აკუმულირებული თანხა 9.4 მილიარდ ლარს აღწევს, ხოლო სისტემაში ჩართული მოქალაქეების რაოდენობა 1 742 000-ს შეადგენს.

გიორგი ჭიჭინაძის თქმით, ფონდი აქტიურად მუშაობს ტექნიკური პლატფორმის შექმნაზე, რომელიც მოქალაქეებს საშუალებას მისცემს, უფრო მარტივად მართონ საკუთარი პორტფელები და საჭიროების შემთხვევაში, თანხები ერთი პორტფელიდან მეორეში გადაიტანონ.

„ნამდვილად მიდის ამაზე მსჯელობა. ჯერჯერობით ტექნიკური დამუშავების პროცესშია. ძალიან გვინდა გავამარტივოთ, ეს არ არის მარტო ჩვენს ნება-სურვილთან დამოკიდებული — გვინდა, რომ ტექნიკურად იყოს გამართული და ბევრი ფუნქციონალი იყოს ამასთან ჩაშენებული, რაზეც ძალიან აქტიურად ვმუშაობთ და ეს ძალიან კარგი იქნება თუ გამოგვივა ამ პლატფორმის შექმნა“, - ამბობს ჭიჭინაძე.