პოლონეთმა თავდაცვის გასაძლიერებლად ევროკავშირისგან €43.7 მილიარდის სესხი მიიღო

პოლონეთმა ევროკავშირის პროგრამა SAFE-ის ფარგლებში პირველი სასესხო ხელშეკრულება გააფორმა. როგორც ირკვევა, ქვეყანა შეიარაღებული ძალების მოდერნიზაციისთვის €43.7 მილიარდს ($47.2 მლრდ.) მიიღებს. მნიშვნელოვანია ითქვას, რომ პოლონეთი არის ევროკავშირის წევრი პირველი სახელმწიფო, რომელმაც ევროპის უსაფრთხოების სამოქმედო გეგმით ისარგებლა. აღნიშნული ინიციატივა რუსეთიდან და ბელარუსიდან მომდინარე პოტენციური საფრთხეების გასამკლავებლად შეიარაღების შესყიდვას ითვალისწინებს.

პრემიერ-მინისტრმა დონალდ ტუსკმა ხელმოწერის ცერემონიაზე განაცხადა, რომ ეს გადაწყვეტილება პოლონეთისა და ევროკავშირის ისტორიაში „გარდამტეხი მომენტია“. მისი თქმით, ეს „გიგანტური თანხა“ უშუალოდ პოლონეთის უსაფრთხოებას, თავდაცვის მრეწველობასა და ტექნოლოგიური შესაძლებლობების გაძლიერებას მოხმარდება.

რაც შეეხება პოლონეთის თავდაცვის ამჟამინდელ სტრატეგიას, ქვეყანა ევროპაში სამხედრო ხარჯების მოცულობით ლიდერია. არსებული ინფორმაციით, 2026 წელს ვარშავა თავდაცვაზე მთლიანი შიდა პროდუქტის 4.8%-ის დახარჯვას გეგმავს. ამ მიზნით ქვეყანამ ტანკების, არტილერიისა და საჰაერო თავდაცვის სისტემების შესაძენად მასშტაბური შეკვეთები უკვე განათავსა. ამასთან, პოლონეთმა უცხოელ მწარმოებლებთან პარტნიორობით შეიარაღების ადგილობრივი წარმოების გაფართოების ინტერესი გამოხატა.

ცნობისთვის, SAFE-ის ინიციატივა ევროკავშირის მიერ შექმნილი €150-მილიარდიანი ფონდია. ის წევრი ქვეყნების სამხედრო პოტენციალის გაძლიერებასა და უსაფრთხოების ერთიანი სისტემის ჩამოყალიბებას ემსახურება.