"პროგრამების ეფექტიანობა უფრო მაღალია, ვიდრე საგადასახადო დანახარჯების" - გაუქმდება თუ არა აგროსექტორში შეღავათები?

ფინანსთა სამინისტროში აცხადებენ, რომ საგადასახადო დანახარჯების რეფორმის ფარგლებში გადაწყდა, რომ განათლების და ჯანდაცვის სექტორებში დაწესებული შეღავათების გაუქმება მიზანშეწონილი არ იქნება.

რაც შეეხება სოფლის მეურნეობის დარგში დაწესებულ შეღავათებს, ფინანსთა მინისტრის მოადგილე BMG-სთან ამბობს, რომ რიგი სახელმწიფო პროგრამების ეფექტიანობა უფრო მაღალია, ვიდრე საგადასახადო დანახარჯები.

შესაბამისად, კითხვაზე იგეგმება თუ არა აგროსექტორში დაწესებული შეღავათების გაუქმება, გიორგი კაკაურიძე ამბობს, რომ არაა გამორიცხული, დარგში არსებული საგადასახადო შეღავათების ნაწილი მომდევნო პერიოდში სწორედ პროგრამების მიმართულებით გადამისამართდეს. თუმცა მისივე თქმით, ეს პროცესი მიმდინარე წელს ვერ მოესწრება.

“სოფლის მეურნეობის სექტორში საგადასახადო დანახარჯების შეფასება გაკეთდა. რაც შეეხება დანარჩენ სექტორებს, რომელიც იყო მთლიანად ამ საგადასახადო დანახარჯებში, ეს არის ჯანდაცვის და განათლების მიმართულება. განათლების მიმართულების შეფასებას აზრიც არ აქვს, ვინაიდან სულ შესაბამისობაში იმ ევროდირექტივებთან, რაც ევროკავშირში განათლებასთან მიმართებაში დაბეგვრა მოქმედებს და შესაბამისად, ამ მიმართულებით ცვლილებები ვერ იქნება. რაც შეეხება ჯანდაცვის ნაწილს, მოგეხსენებათ მეტად სოციალური მიმართულებაა და აქაც ამ ეტაპზე რაიმე მნიშვნელოვანი ცვლილებები და დანახარჯების შემცირება დაგეგმილი არ არის.

რაც შეეხება სოფლის მეურნეობას, წლის ბოლომდე ჩვენ უკვე გვექნება [სახელმწიფო] პროგრამების ეფექტურობა [ანალიზი]. პროგრამების ეფექტურობა უფრო მაღალი ჩანს, ვიდრე საგადასახადო დანახარჯების. იმისათვის რომ სოფლის მეურნეობის დარგის განვითარება მივიღოთ, ეტაპობრივად შეიძლება დავიწყოთ რაღაც დანახარჯების გადატანა შესაბამის პროგრამებთან მიმართებაში. ეს შეიძლება ეკონომიკურად და სექტორისთვისაც უფრო გამართული იყოს. თუმცა ეს მიმდინარე წელს და მომდევნო წელს არ იქნება, რა თქმა უნდა. ამას სჭირდება ანალიზი და შესაბამისი [სახელმწიფო] პროგრამების განახლება. ამის მიხედვით შეიძლება შემდეგ მივიღოთ დანახარჯებთან მიმართებაში გადაწყვეტილება”, - განაცხადა გიორგი კაკაურიძემ.