ქართული კომპანიები ამსტერდამის საერთაშორისო გამოფენაზე ეროვნული პავილიონით წარდგნენ

ამსტერდამში გამართულ საერთაშორისო გამოფენაზე World of Private Label International Trade Show ქართული კომპანიები ეროვნული პავილიონით იყვნენ წარმოდგენილი.

საგულისხმოა, რომ World of Private Label International Trade Show, რომელიც 19-20 მაისს გაიმართა, კერძო ეტიკეტის ინდუსტრიის ერთ-ერთ უმსხვილეს საერთაშორისო გამოფენად ითვლება და მსოფლიოს სხვადასხვა ქვეყნის მწარმოებლებს, დისტრიბუტორებსა და სავაჭრო ქსელების წარმომადგენლებს აერთიანებს.

ღონისძიებაში მონაწილეობდნენ ისეთი ქართული კომპანიები, როგორებიცაა - „აჩინებული“, „აქტო“, „ბრიცა“, „ჰობი“, „Nuts Incorporated“, „ველინგტონი“ და „ემელ ფუდ ჯორჯია“.

გარემოს დაცვისა და სოფლის მეურნეობის სამინისტროს მხარდაჭერითა და სოფლის განვითარების სააგენტოს ორგანიზებით მოწყობილ პავილიონში სტუმრებს ქართული წარმოების მრავალფეროვანი პროდუქცია წარუდგინეს, მათ შორის - ნატურალური წვენები, ღვინო, ალკოჰოლური სასმელები, თაფლი, ჩიფსი და თხილი.

გამოფენას ესწრებოდნენ სოფლის განვითარების სააგენტოს დირექტორის მოადგილე გიორგი ავალიანი და ნიდერლანდების სამეფოში საქართველოს საქმეთა დროებითი რწმუნებული გიორგი საგანელიძე.

გიორგი ავალიანის განცხადებით, აღნიშნული გამოფენა მნიშვნელოვანი პლატფორმაა ქართული აგროსასურსათო პროდუქციის პოპულარიზაციისთვის, საერთაშორისო ბაზრებზე ცნობადობის გაზრდისა და ახალი სავაჭრო პარტნიორების მოძიებისთვის.