ქართველი ფერმერებისთვის სასუქებსა და პესტიციდებზე ფასების მკვეთრი ზრდა არ ფიქსირდება - რობერტ რევია

მიუხედავად მსოფლიოში არსებული რთული პროცესებისა, მიმდინარე სეზონზე ქართველი ფერმერებისთვის სასუქებსა და პესტიციდებზე ფასების მკვეთრი ზრდა არ ფიქსირდება, - ამის შესახებ BMG-სთან აგრომაღაზია „კარტლისის“ დირექტორი რობერტ რევია აცხადებს.

მისი თქმით, აგროსექტორი სპეციფიკური დარგია, სადაც შეკვეთების განთავსება და დაგეგმარება თვეებით, ზოგჯერ კი, წლებით ადრე ხდება. ამიტომ, წლევანდელი სეზონისთვის საჭირო პროდუქცია გასულ წელს, იმ დროისთვის არსებული ფასით შემოვიდა.

„სეზონისთვის მომარაგება ჯერ კიდევ გასული წლის ოქტომბერ-იანვარში დასრულდა. შესაბამისად, იმ პროცესებს, რაც ახლა მსოფლიოში მიმდინარეობს, დღევანდელ ფასებზე გავლენა ჯერ არ მოუხდენია. ჩვენ ფასები არ გაგვიზრდია, პირიქით - გარკვეულ პროდუქციაზე ფასდაკლებებიც კი გვაქვს“, - აღნიშნავს „კარტლისის“ დირექტორი BMG-სთან.

მისივე განმარტებით, მომავალი სეზონის პროგნოზი დიდწილად გლობალურ პოლიტიკურ და ეკონომიკურ ვითარებაზეა დამოკიდებული და თუკი კონფლიქტი და ლოგისტიკური კრიზისი გაჭიანურდება, ეს ადგილობრივ ბაზარზე პროდუქციის გაძვირებას გამოიწვევს.

„თუ ეს ვითარება დიდხანს გაგრძელდა, პროდუქცია რა თქმა უნდა, გაძვირდება. ყველაზე მეტად ფასების მატება მოსალოდნელია სასუქებზე. შედარებით ნაკლებად გაძვირდება პესტიციდები და სათესლე მასალა. ზუსტი სურათი, თუ რა ტარიფებით მოგვიწევს ახალი კონტრაქტების გაფორმება, აგვისტო-სექტემბერში გამოიკვეთება“,- აღნიშნავს ის.

კითხვაზე, საწვავის გაზრდილმა ხარჯებმა ფერმების მხრიდან სასუქებსა და პესტიციდებზე მოთხოვნის შემცირება ხომ არ გამოიწვია, რობერტ რევია პასუხობს, რომ სექტორში აქტივობა მაინც მაღალია. მისი დაკვირვებით, ფერმერებს საკუთარი მოსავლის სარეალიზაციო ფასებთან დაკავშირებით ოპტიმისტური მოლოდინი აქვთ.

„მოთხოვნა არ შემცირებულა, სეზონი აქტიურად მიმდინარეობს. ერთადერთი, რაც პროცესებს აფერხებს, კლიმატური პირობებია. თავად ფერმერებს აქვთ მოლოდინი, რომ საკვებ პროდუქტებზე ფასები არ დაიწევს, რაც მათ მოტივაციას ზრდის. ისინი ფიქრობენ, რომ თუ ფასი არ მოიმატებს, მინიმუმ არსებულ ნიშნულზე მაინც შენარჩუნდება, ამიტომ აგრო-სამუშაოებზე უარს არ ამბობენ“, - აცხადებს რობერტ რევია.