ქრისტიანობის სახელმწიფო რელიგიად გამოცხადების 1700-ე წლისთავის აღნიშვნა ₾5.3 მილიონი დაჯდება

მთავრობის განკარგულების თანახმად, ქრისტიანობის სახელმწიფო რელიგიად გამოცხადების 1700-ე წლისთავის აღნიშვნის ბიუჯეტი 5.3 მილიონი ლარი იქნება.

21 მაისის განკარგულების თანახმად, თანხის გამოყოფა მთავრობის სარეზერვო ფონდიდან მოხდება. რამდენიმე დღის წინ, 19 მაისს, 1700-ე წლისთავის საიუბილეო ღონისძიებებთან დაკავშირებით იმსჯელეს საქართველოს მთავრობისა და საპატრიარქოს ერთობლივი კომისიის სხდომაზე, რომელიც მთავრობის ადმინისტრაციაში გაიმართა. მთავრობის ადმინისტრაციის თანახმად, საიუბილეო ღონისძიებები პირველი ივნისიდან გაგრძელდება და 14 ოქტომბრის ჩათვლით გაგრძელდება.

კომისიის თანათავმჯდომარეები არიან საქართველოს პრემიერ-მინისტრი ირაკლი კობახიძე და სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი, უწმინდესი და უნეტარესი შიო მესამე.

„საიუბილეო ღონისძიებები, რომლებიც 26 მაისიდან დაიწყება, პირველი ივნისიდან მასშტაბურ სახეს მიიღებს და მოიცავს როგორც კულტურულ-საგანმანათლებლო პროგრამას, ისე სამეცნიერო კონფერენციებსა და სტუდენტურ ექსპედიციებს.

ქრისტიანობის სახელმწიფო რელიგიად გამოცხადების 1 700 წლის იუბილეს აღსანიშნავი ღონისძიებები სვეტიცხოვლობის დღესასწაულის ჩათვლით გაგრძელდება. 14 ოქტომბერს დაგეგმილია სიმპოზიუმი თემაზე – „ღმერთი, სამშობლო, ადამიანი“.

საიუბილეო ღონისძიებები საქართველოს მთავრობისა და საპატრიარქოს კოორდინაციით განხორციელდება“, – ნათქვამია საქართველოს მთავრობის ინფორმაციაში.