Qualcomm-მა ByteDance-თან ხელოვნური ინტელექტის ჩიპების მიწოდებაზე შეთანხმებას მიაღწია
ამერიკულმა ტექნოლოგიურმა კომპანია Qualcomm-მა TikTok-ის მფლობელ ჩინურ ByteDance-თან ხელოვნური ინტელექტის მონაცემთა ცენტრებისთვის განკუთვნილი ჩიპების მიწოდებაზე შეთანხმებას მიაღწია.
Bloomberg-ის ანონიმური წყაროების ცნობით, ჩინური გიგანტი მილიონობით სპეციალიზებული ინტეგრალური სქემის შესყიდვას გეგმავს. როგორც ირკვევა, ეს ახალი აპარატურა სოციალური ქსელის მიერ ხელოვნური ინტელექტის პროგრამული აგენტების ამუშავებისთვის იქნება გამოყენებული.
ამერიკულ-ჩინური დაპირისპირების ფონზე, აღსანიშნავი ფაქტია, რომ მიწოდებული ჩიპების გამოთვლითი სიმძლავრე აშშ-ის მიერ დაწესებულ სამართლებრივ ზღვარს არ სცდება. შესაბამისად, ახალი პარტნიორები არსებულ ამერიკულ სავაჭრო შეზღუდვებს არ დაარღვევენ და ჩიპებით ვაჭრობას სახაზინო დეპარტამენტის დამატებითი კონტროლის გარეშე მოახერხებენ.
ბაზრის ანალიტიკოსების შეფასებით, ეს გარიგება ამერიკული მწარმოებლისთვის სმარტფონების სეგმენტიდან ხელოვნური ინტელექტის ინფრასტრუქტურაზე გადასვლისთვის საუკეთესო "სტარტი" იქნება და ხელს შეუწყობს სხვა სამომავლო გარიგებების დადებასაც როგორც ქვეყნის შიგნით, ისე გლობალურად.
შეგახსენებთ, რომ აშშ-სა და ჩინეთს შორის ტექნოლოგიური ლიდერობისთვის ბრძოლაში ნახევარგამტარებით ვაჭრობა დაპირისპირების მთავარ წერტილად იქცა. ოფიციალური პეკინი ამერიკული სანქციების გავლენის გასანეიტრალებლად საკუთარ ინდუსტრიას აქტიურად ავითარებს, თუმცა ვერცერთი ადგილობრივი კომპანია ჯერ ვერ ახერხებს Nvidia-ს დონის ჩიპების შექმნას.
BM.GE
წყარო: bm.ge