ქვეყნის პოპულარიზაციისთვის ქართული დიასპორის არ გამოყენება დანაშაულია - ლაშა ბერეკაშვილი
"წლებია ქუთაისის აეროპორტს ახალი ავიაკომპანია არ დამატებია, რაც აფერხებს ევროპელი ტურისტების ნაკადის ზრდას", - ამის შესახებ BMG-სთან Travel to Georgia-ს დირექტორი ლაშა ბერეკაშვილი საუბრობს.
მისი თქმით, თბილისში რამდენიმე ევროპული დაბალბიუჯეტიანი ავიაკომპანია დაემატა, თუმცა, არა იმ სიხშირითა და რაოდენობით, რაც იმ დანაკლისის შევსებას სჭირდება, რომელიც ამჟამად საქართველოს ისრაელიდან და ყურის ქვეყნებიდან აქვს.
ლაშა ბერეკაშვილი მიიჩნევს, რომ ერთ-ერთი გამოსავალი ქართული დიასპორის გააქტიურება და სომხეთის მაგალითის გაზიარებაა, რომელიც ევროპასა და ამერიკაში მცხოვრებ თანამემამულეებს ქვეყნის პოპულარიზაციისთვის ეფექტურად იყენებს.
„ჩვენ მთელი ყურადღება უნდა მივაპყროთ ევროპის ბაზრისკენ, იქ არ არის იქ რაიმე ძირეული რყევები და იქიდან ჩამოსული ტურისტების აქტივობა პროგნოზირებადია. ამ მიმართულებით თუ გავაქტიურდებით და ვიმუშავებთ, საკმაოდ მნიშვნელოვან შედეგს დავდებთ.
რა უნდა გავაკეთოთ ამისათვის? ეს არის ახალი ავიაკომპანიების ქუთაისის აეროპორტში შემოყვანა და მათი დაინტერესება, რომ დაიწყონ ქუთაისში ფრენა. მეორე - არსებული სიხშირეების გაზრდა და ახალი რეისების დამატება. მესამე - ეს არის ჩვენი დიასპორის აქტიური გამოყენება ევროპის მიმართულებით.
ათობით ათასი ქართველი ცხოვრობს ევროპის ქვეყნებში. მათ იციან იქაური ენა, იქაური წესი, ჩვეულება და ა. შ. საჭიროა, იქ მყოფი ჩვენი ქართული დიასპორის აქტიური ჩართვა და გამოყენება იმისთვის, რომ ადგილობრივებთან იმუშაონ საქართველოში უფრო გამარტივებული და საინტერესო მოგზაურობისთვის - ამ პოტენციალის არ გამოყენება არის დანაშაული. მაგალითისთვის მოვიყვან სომხეთს, რომელიც საკმაოდ აქტიურად იყენებს თავის დიასპორას როგორც ევროპაში, ისე ამერიკაში და კანადაში. ეს დიდწილად, სომხური დიასპორის დამსახურებაა, რომელიც აქტიურად მუშაობს თავიანთ ქვეყანაზე" - ამბობს ლაშა ბერეკაშვილი BMG-სთან.
2026 წლის II კვარტალში საერთაშორისო ვიზიტორების ვიზიტები 4.5%-ით, ხოლო ტურისტული ვიზიტები 2.7%-ით შემცირდა. ტურიზმის ეროვნული ადმინისტრაციის ინფორმაციით, ვიზიტორების კლებაზე გავლენა ახლო აღმოსავლეთში სამხედრო დაპირისპირებამ იქონია, რის გამოც ირანიდან ვიზიტები 49%-ით, ხოლო ისრაელიდან თითქმის 12%-ით შემცირდა. კლება ასევე ფიქსირდება თურქეთიდან, სომხეთიდან და აშშ-დან. ჯამში, 2026 წლის პირველ ნახევარში, საერთაშორისო მოგზაურთა ვიზიტების რაოდენობამ 3 მლნ ვიზიტი შეადგინა, რაც 2025 წლის ანალოგიურ პერიოდთან შედარებით 3.3%-ით ნაკლებია.