რა გამოწვევებია თხილის სექტორში? - მერაბ ჭითანავას განმარტება
თხილის სექტორში მთავარი გამოწვევა მცირე ფერმერების არასტაბილური ჩართულობა და შედეგად, ხარისხისა და მოსავლიანობის მკვეთრი განსხვავებაა. სწორედ ამ პრობლემაზე გაამახვილა ყურადღება BMGTV-ს გადაცემაში “ანალიტიკა” "თხილის მწარმოებელთა ასოციაციის" აღმასრულებელი საბჭოს თავმჯდომარემ მერაბ ჭითანავამ.
მისი განმარტებით, სექტორი ფაქტობრივად ორ ნაწილად იყოფა: მსხვილი ფერმერული ბაღები, სადაც ბიზნესი მართავს პროცესს და დინამიკური ზრდა ფიქსირდება როგორც ხარისხში, ისე მოსავლის რაოდენობაში, და მცირე ფერმერები, რომლებიც საქართველოს თხილის წარმოების 60%-ზე მეტს ფლობენ, თუმცა მათ შემთხვევაში სტაგნაცია ან უკუსვლაც კი შეინიშნება.
ჭითანავას თქმით, მცირე ფერმერების ქცევა დიდწილად დამოკიდებულია ბაზრის ფასებზე. ვინაიდან, მაღალი ფასის პირობებში ისინი აქტიურდებიან და ბაღებს უკეთ უვლიან, ხოლო ფასების შემცირებისას ნაკლებ ყურადღებას უთმობენ, რაც საბოლოოდ პროდუქციის ხარისხსა და რაოდენობაზე აისახება.
"ეს მოცემულობა წელსაც ძალიან მკაფიოდ გამოჩნდა, როდესაც ბაზარზე იყო პრეცედენტები - ერთ შემთხვევაში გაუტეხავი თხილი 13 ლარად გაიყიდა, ხოლო სხვა შემთხვევაში ფერმერებმა პროდუქცია 2-3 ლარად გაასაღეს", - აღნიშნა მან.
მისივე შეფასებით, ეს ციკლური დინამიკა წლების განმავლობაში უცვლელად მეორდება, თუმცა მსხვილი მეურნეობების მიმართულებით პოზიტიური სურათი ნარჩუნდება და ქვეყანა თანდათან პრემიუმ ხარისხის თხილის წარმოებისკენ გადადის.
ჭითანავა მიიჩნევს, რომ გამოსავალი მიზნობრივი მხარდაჭერის მოდელშია. მისი თქმით, სოფლის მეურნეობის სამინისტროს მიერ დაანონსებული ინიციატივები - მათ შორის საბრუნავი კაპიტალის მხარდაჭერა, პირველადი წარმოების თანადაფინანსება და „ფერმერის ბარათის“ მოდელი - სექტორისთვის მნიშვნელოვანი ნაბიჯია.
"რესურსები შეზღუდულია და უკეთესი იქნება, თუ ისინი მიემართება იმ ფერმერებს, რომლებიც შედეგზე არიან ორიენტირებულნი. მთელ სექტორზე ერთგვაროვანი მხარდაჭერა უკვე ვცადეთ და ეფექტი არ იყო საკმარისი", - განაცხადა ჭითანავამ.