რა სინჯის და რამდენი ოლიმპიური მედალი მოიპოვა საქართველომ დამოუკიდებლობის დღიდან დღემდე?
საქართველოს ოლიმპიური ისტორია დამოუკიდებლობის აღდგენის შემდეგ ნამდვილი სპორტული ფენომენია. 1994 წლის ლილეჰამერის ზამთრისა და 1996 წლის ატლანტას ზაფხულის თამაშებიდან მოყოლებული, ქართველმა სპორტსმენებმა ქვეყნის ყულაბას ჯამში 48 ოლიმპიური მედალი შემატეს, მათ შორის: 13 ოქრო, 16 ვერცხლი და 19 ბრინჯაო.
საინტერესოა, რომ ამ მონაგარში აბსოლუტური უმრავლესობა ზაფხულის სახეობებზე მოდის, თუმცა 2026 წლის მილანო-კორტინას ზამთრის ოლიმპიადაზე ფიგურულ ციგურაობაში ანასტასია მეტელკინამ და ლუკა ბერულავამ სპორტულ წყვილებში ისტორიული, პირველი ზამთრის ვერცხლის მედალი მოიპოვეს.
ქართული ოლიმპიური წარმატების მთავარ დასაყრდენად ტრადიციულად ჭიდაობა და ძიუდო რჩება. ჭიდაობაში (თავისუფალი და ბერძნულ-რომაული სტილი) სპორტსმენებმა 21 მედალი დააგროვეს. ოქროს მედლებს დაეუფლნენ მანუჩარ კვირკველია, რევაზ მინდორაშვილი, ვლადიმერ ხინჩეგაშვილი და გენო პეტრიაშვილი. ვერცხლის მედლები მოიპოვეს რამაზ ნოზაძემ, გიორგი გოგშელიძემ, დავით მოძმანაშვილმა, ვლადიმერ ხინჩეგაშვილმა, იაკობ ქაჯაიამ, გენო პეტრიაშვილმა და გივი მაჭარაშვილმა, ხოლო ბრინჯაოს პრიზიორები გახდნენ ელდარ კურტანიძე (ორგზის), აკაკი ჩაჩუა, მუხრან ვახტანგაძე, გიორგი გოგშელიძე, დათო მარსაგიშვილი, ოთარ თუშიშვილი, შმაგი ბოლქვაძე, გენო პეტრიაშვილი და ლაშა გობაძე.
არანაკლებ შთამბეჭდავია ძიუდოისტთა მონაგარი - 15 მედალი. ოქროს მედლებით გვასახელეს ზურაბ ზვიადაურმა, ირაკლი ცირეკიძემ, ლაშა შავდათუაშვილმა და ლაშა ბექაურმა, რომელმაც ჩემპიონობა ზედიზედ ორჯერ (ტოკიოსა და პარიზში) იზეიმა. ვერცხლის მედლებს დაეუფლნენ ნესტორ ხერგიანი, ვაჟა მარგველაშვილი, გურამ თუშიშვილი, ლაშა შავდათუაშვილი, ტატო გრიგალაშვილი, ილია სულამანიძე და გიორგი სარდალაშვილი, ხოლო ბრინჯაოს პრიზიორები ამირან ტოტიკაშვილი და ლაშა შავდათუაშვილი გახდნენ. აღსანიშნავია, რომ შავდათუაშვილი ერთადერთი ქართველი ძიუდოისტია, რომელიც ოლიმპიური მედლების სრულ კომპლექტს ფლობს.
ძალისმიერ სახეობებში ლიდერობას ინარჩუნებს ძალოსნობა 8 მედლით, სადაც უპირობო ლიდერი ლეგენდარული ლაშა ტალახაძეა - სამგზის ოლიმპიური ჩემპიონი და რეკორდსმენი (2016, 2020, 2024 წლებში). ოქროს მედალი ასევე მოპოვებული აქვს გიორგი ასანიძეს, ვერცხლი - არსენ კასაბიევს, ხოლო ბრინჯაოს მედლებს სხვადასხვა წლებში გიორგი ასანიძე, ირაკლი თურმანიძე და ანტონ პლესნოი დაეუფლნენ.