რამდენი მილიარდი დახარჯა ამერიკამ ირანთან ომში?

აშშ-ის თავდაცვის დეპარტამენტის მიერ კონგრესისთვის წარდგენილი ანგარიშის თანახმად, აგვისტოს მდგომარეობით, ირანის წინააღმდეგ მიმდინარე სამხედრო კამპანიის ჯამურმა ღირებულებამ $33.4 მილიარდი შეადგინა. დოკუმენტიდან ირკვევა, რომ ინტენსიურმა საბრძოლო მოქმედებებმა ქვეყნის თავდაცვით არსენალში დეფიციტი წარმოქმნა და სამრეწველო ინდუსტრიაში არსებული შეფერხებები გამოავლინა.

ანგარიშის მიხედვით, საბრძოლო მოქმედებების დროს ამერიკულმა მხარემ მნიშვნელოვანი ტექნიკური და ინფრასტრუქტურული დანაკარგი განიცადა. ირანული მხარის იერიშების შედეგად ახლო აღმოსავლეთში განთავსებულ აშშ-ის სამხედრო ბაზებზე ათობით შენობა და ნაგებობა დაზიანდა ან განადგურდა. ამასთან, მტერმა ათეულობით ამერიკული საფრენი აპარატი დააზიანა. განადგურებულია ოთხი F-15E ტიპის გამანადგურებელი და ერთი A-10 ტიპის მოიერიშე თვითმფრინავი, დაზიანება კი პირველად მიიღო მეხუთე თაობის F-35A-ს მოდელის საბრძოლო თვითმფრინავმაც. სამხედრო საჰაერო ძალებმა ასევე დაკარგეს შვიდი KC-135 ტიპის საწვავშემვსები თვითმფრინავი, შვიდი ვერტმფრენი და 30-ზე მეტი უპილოტო საფრენი აპარატი.

არსებული ინფორმაციით, სამხედრო ხარჯების გარდა, სერიოზული ზიანი მიადგა რეგიონში არსებულ ამერიკულ დიპლომატიურ წარმომადგენლობებსაც. ერაყში, ქუვეითში, საუდის არაბეთსა და არაბთა გაერთიანებულ საამიროებში განთავსებულ დიპლომატიურ ობიექტებზე მიყენებულმა პირდაპირმა მატერიალურმა ზარალმა $184 მილიონი შეადგინა.