რას მოითხოვს ირანი აშშ-სთან მიმდინარე ომის დასრულების სანაცვლოდ?

ირანის ხელისუფლებამ აშშ-სთან მიმდინარე ომის დასრულების საკუთარი ოფიციალური მოთხოვნები წარადგინა. არსებული ინფორმაციით, თეირანი ბირთვულ პროგრამაზე დისკუსიის გადავადებას და სამხედრო მოქმედებების სრულ შეწყვეტაზე ფოკუსირებას ითხოვს. ეს სტრატეგია ყველა ფრონტზე, მათ შორის ლიბანში კონფლიქტის დასრულებასაც ისახავს მიზნად. ირანული მხარე ამერიკული სანქციების ეტაპობრივ გაუქმებასა და გაყინული ფინანსური აქტივების სრულ გათავისუფლებას მოითხოვს.

დამატებით, თეირანი აშშ-ისა და ისრაელისგან სამხედრო მოქმედებების შედეგად მიყენებული ზარალის ანაზღაურებასაც ელოდება. ქვეყნის ხელისუფლება ვაშინგტონისგან მომავალში ძალის გამოუყენებლობის მყარ სამართლებრივ გარანტიებს ითხოვს.

რაც შეეხება მაღალგამდიდრებული ურანის მარაგს, თეირანი მის სხვა ქვეყნისთვის გადაცემას კატეგორიულად ეწინააღმდეგება. ირანის საგარეო საქმეთა სამინისტროს განმარტებით, თუ შეთანხმება შედგა, ის მასალას თავად, საკუთარ ტერიტორიაზე გაანადგურებს.

ირანის მოთხოვნების ერთ-ერთ მთავარ პუნქტად ჰორმუზის სრუტეზე საგადასახადო სისტემის შემოღება რჩება. კერძოდ, ქვეყნის მიერ შექმნილ სპეციალურ უწყებას უნდა მიეცეს უფლება, კომერციულ გემებზე ფულადი გადასახადები დააწესოს და პროცესი მართოს. ამასთან, თეირანი სავაჭრო მარშრუტების საკუთარ ტერიტორიულ წყლებში გადატანასა და ხომალდების მოძრაობის პირდაპირ კონტროლსაც ითხოვს. როგორც ირკვევა, ამ გეგმის რეალიზებით ირანს ეკონომიკური სარგებლის მიღება და სუვერენიტეტის განმტკიცება სურს.