რატომ იზრდება ამერიკული საფონდო ბირჟა რეკორდულად? – Goldman Sachs-ის შეფასება

ბოლო ერთი თვის განმავლობაში, ამერიკული საფონდო ბირჟა ყოველ კვირა ახალ რეკორდულ მწვერვალებს აღწევს, რაც აჩენს ლოგიკურ შეკითხვა: რატომ იზრდება საფონდო ბირჟა, როცა ეკონომიკური მდგომარეობა გაურკვეველია და გეოპოლიტიკური ვითარება საკმაოდ მძიმეა?

Goldman Sachs-ის ანალიტიკოსის, ბენ სნაიდერის განცხადებით, ენერგომატარებლებზე მაღალი ფასებისა და გეოპოლიტიკური გაურკვევლობის მიუხედავად, კორპორაციული სექტორი გამორჩეულ სიმტკიცეს ავლენს. ამერიკული კომპანიების პირველი კვარტალის ფინანსურმა მაჩვენებლებმა პროგნოზებს მნიშვნელოვნად გადააჭარბა, რაც საფონდო ბაზრის ბოლოდროინდელი ზრდის ძირითადი მიზეზია.

ამ დროისთვის S&P 500-ის ინდექსში შემავალი კომპანიების 63%-მა ანგარიშგება უკვე წარადგინა, რის შედეგადაც ერთ აქციაზე მოგების ზრდამ 16% შეადგინა. აღსანიშნავია, რომ ბოლო 25 წლის განმავლობაში, პანდემიის შემდგომი პერიოდის გამოკლებით, მოლოდინებზე დაბალი მოგების დაფიქსირების ყველაზე დაბალი მაჩვენებელი სწორედ ამ კვარტალში აღირიცხა.

ფინანსური შედეგების მიხედვით ტექნოლოგიური გიგანტების მაჩვენებლები განსაკუთრებით შთამბეჭდავია. Amazon-ის, Google-ის, Meta-სა და Microsoft-ის ერთობლივი შემოსავალი 20%-ით, ხოლო წმინდა მოგება 61%-ით გაიზარდა.

როგორც ირკვევა, ინვესტორების ყურადღება ძირითადად შემოსავლებზეა ფოკუსირებული, რაც ხელოვნურ ინტელექტში განხორციელებული ინვესტიციების უკუგების საზომად მიიჩნევა.

Goldman Sachs-ის პროგნოზით, 2026 წლისთვის AI ინფრასტრუქტურაზე ჰიპერსკეილერების კაპიტალური დანახარჯები $751 მილიარდს მიაღწევს, რაც 2025 წლის მაჩვენებელს 83%-ით აღემატება.

საინვესტიციო ბანკის შეფასებით, რეკორდული ზრდა მოსალოდნელზე გაცილებით უკეთესი ფინანსური შედეგებით არის განპირობებული და თუ კომპანიები ასეთი ტემპით გააგრძელებენ ზრდას, მაშინ საფონდო ბირჟის აღმასვლაც გარდაუვალი იქნება.