რითეილ სექტორში კონკურენცია კიდევ უფრო გამძაფრდება - "რითეილ ასოციაცია" ekalata.gov.ge-ის ამოქმედებაზე

მთავრობის ახალი პლატფორმა რითეილ სექტორში კონკურენციას მნიშვნელოვნად გაამძაფრებს, რაც საბოლოო ჯამში მომხმარებლის ინტერესებზე აისახება - ამის შესახებ BMG-სთან „რითეილ ასოციაციის“ აღმასრულებელი დირექტორი სოფო ქაშაკაშვილი საუბრობს.

მისი თქმით, სექტორი სახელმწიფო სტრუქტურებთან თანამშრომლობას განაგრძობს - პლატფორმის ამოქმედებამდე რითეილერებმა დიდი სამუშაო გასწიეს.

„მუდმივ კოორდინაციაში ვიყავით კონკურენციის სააგენტოსთან. შესაბამისად, თვითონ რითეილ სექტორსაც დიდი წვლილი აქვს ამ პლატფორმის ამოქმედებაში.

საიტზე ძალიან მარტივად შეიძლება ერთი პროდუქციის გაფილტვრით დავინახოთ, ყველა სხვა ქსელურ მარკეტში რა ფასებია პროდუქტზე, რაც შედარების უნარს აძლევს როგორც მომხმარებელს, ისევე ბიზნესს. შესაბამისად, კიდევ უფრო გამძაფრდება კონკურენცია და ყველა ქსელი ეცდება, კიდევ უფრო მიმზიდველ ფასებად შესთავაზოს მომხმარებელს ეს პროდუქცია“ - აცხადებს სოფო ქაშაკაშვილი BMG-სთან.

კითხვაზე - რატომ ფიქსირდება პლატფორმაზე სხვადასხვა ქსელების ზოგიერთ პროდუქტზე ფასების მკვეთრი სხვაობა, ასოციაციის ხელმძღვანელი ამას მაღაზიების ფორმატების განსხვავებით ხსნის:

„პირველ რიგში, უნდა მივაქციოთ ყურადღება თვითონ მაღაზიის ფორმატს. ჩვენ საკმაოდ განებივრებული ვართ სხვადასხვა ფორმატის ქსელური მარკეტებით - არის "დისკაუნტერის" ტიპის მარკეტები და არის უფრო მაღალ სეგმენტზე გათვლილი ქსელური მარკეტები, რომელიც არ არის ორიენტირებული დაბალ ფასზე, არამედ - მაღალ ხარისხზე.

შესაძლოა, ეს იყოს უფრო დიდი მაღაზია, სადაც უფრო დიდი იჯარის გადახდა უწევთ, ჰყავთ სხვანაირად გადამზადებული თანამშრომლები, სთავაზობენ სრულ კონსულტირებას და ა.შ. ასეთ მაღაზიებში, შესაძლოა, იყოს ფასთა სხვაობა იმიტომ, რომ საოპერაციო ხარჯიც უფრო მაღალი ჰქონდეს“ - აცხადებს სოფო ქაშაკაშვილი.