რკინიგზას მგზავრების გადაყვანა ₾56 მილიონზე მეტი დაუჯდა, აქედან მგზავრებმა მხოლოდ ₾31 მლნ გადაიხადეს
2025 წელს რკინიგზას მგზავრთა გადაყვანა 56 403 229 ლარი დაუჯდა, საიდანაც დაახლოებით 31 მლნ ლარი მგზავრების მიერ გადახდილი თანხა იყო, ხოლო 8 მლნ ლარი სახელმწიფო ბიუჯეტიდან მიღებული.
სარკინიგზო ტრანსპორტის სააგენტოს მიერ გამოქვეყნებული ანგარიშის მიხედვით, საზოგადოებრივი მომსახურების კომპენსაციის ანგარიშგების თანახმად, 2025 წელს ხელშეკრულების ფარგლებში მგზავრთა გადაყვანიდან მიღებულმა ჯამურმა შემოსავალმა 31 268 652 ლარი შეადგინა.
საზოგადოებრივი მომსახურების ვალდებულების შესრულებისთვის 2025 წელს გაწეულმა ჯამურმა ხარჯმა შეადგინა - 56 403 229 ლარი. დისბალანსი შემოსავალასა და ხარჯებს შორის 24 986 998 ლარი იყო, საიდანაც სახელმწიფო ბიუჯეტიდან დაკომპენსირდა 32%, ანუ კომპანიას 8 მლნ ლარის ოდენობის კომპენსაცია ჩაერიცხა.
საზოგადოებრივი მომსახურების კომპენსაციის ოდენობა განისაზღვრება ყოველწლიურად, აღნიშნულისთვის სახელმწიფო ბიუჯეტიდან გამოყოფილი ასიგნებების შესაბამისად. კომპენსაციის გადახდას ეკონომიკის სამინისტრო უზრუნველყოფს.
"საზოგადოებრივი მომსახურების კომპენსაციის მიზნებისთვის, შემოსავალი მოიცავს მგზავრთა გადაყვანიდან (ბილეთების რეალიზაციიდან) მიღებულ შემოსავალს. ხარჯები განაწილდება ყოველ მატარებელკილომეტრზე თითოეულ მიმართულებაზე, რომელიც შეიცავს პირდაპირ ხარჯებს, არაპირდაპირ ხარჯებს და ინფრასტრუქტურით სარგებლობის ხარჯს. ხარჯები არ მოიცავს სარკინიგზო ტრანსპორტის სააგენტოს მომსახურების საფასურებს. სარკინიგზო ოპერატორის ნებისმიერ სხვა საქმიანობასთან დაკავშირებული ყველა ცვლადი ხარჯი, ფიქსირებულ ხარჯებში სათანადო კონტრიბუცია და გონივრული მოგება არ უნდა იქნეს დაკისრებული საზოგადოებრივი მომსახურების ხელშეკრულების ფარგლებში", - წერია ანგარიშში.
BM.GE
წყარო: bm.ge