როგორ შეიცვალა დღეს ნავთობის და გაზის ფასები?

დღევანდელ სავაჭრო სესიაზე ენერგეტიკულ ბირჟაზე კორექცია შეინიშნება – ბარელი Brent-ის ფასი 2%-ით არის შემცირებული და 107 დოლარს შეადგენს; ხოლო WTI-ის მარკის ნავთობის ფასი 2.5%-იან კორექციას აფიქსირებს და 103 დოლარად ივაჭრება. რუსული Urals-ის ფასი წელს 120%-ით არის გაზრდილი და ის ამჟამად 111 დოლარს აღწევს.

მიუხედავად მცირედი გაუფასურებისა, წლის დასაწყისიდან დღემდე ნავთობის საშუალოდ მაინც 80%-ით არის გაძვირებული; ხოლო ერთი თვის განმავლობაში მატების მაჩვენებელი 20%-ს აღწევს.

რაც შეეხება ბუნებრივ არის, მისი ფასი დღეს 1.5%-ით არის გაზრდილი და მეგავატი/საათი ენერგიის ფასი 81 დოლარს შეადგენს, რაც წელს 187%-ით გაზრდილი მაჩვენებელია.

მკვეთრად არის გაძვირებული საავიაციო საწვავიც, რომლის გლობალური საშუალო ღირებულება წლის დასაწყისიდან დღემდე თითქმის 100%-ით არის გაზრდილი და ბარელზე 171 დოლარს აჭარბებს.

დღეს ნავთობის ოდნავი გაუფასურება Reuters-ის მიერ გავრცელებულ ინფორმაციას უკავშირდება. სააგენტოს ცნობით, გასულ კვირას აშშ-ში ნედლი ნავთობის, ბენზინისა და დისტილატების მარაგები გაიზარდა. კერძოდ, ნედლი ნავთობის მარაგები 7.1 მილიონი ბარელით გაიზარდა, მაშინ როდესაც ანალიტიკოსები მარაგების 1.6 მილიონი ბარელით შემცირებას პროგნოზირებდნენ. ამ სიახლემ ბაზარს ამოსუნთქვის მცირედი საშუალება მისცა, თუმცა ერთწლიან პერსპექტივაში ნავთობის მაინც მკვეთრადაა გაძვირებული.

ზოგადად, ენერგეტიკულ ბაზარზე არსებულ ვითარებას ახლო აღმოსავლეთში ვითარების გაუარესება, აშშ-ირანის მოლაპარაკების პროცესის ჩაშლა, იემენელი ჰუსტიების მიერ იერიშების განხორციელება და ჰორმუზის სრუტის პარალიზება იწვევს.

ინვესტორები შიშობენ, რომ ვითარება წლის ბოლომდე ვერ გამოსწორდება, რასაც მოახლოებული ზამთრის პერიოდი და ამოწურული სტრატეგიული მარაგების პრობლემა ემატება.