სად ვყიდულობთ ახალ და გაყინულ თევზს, რომელიც აპრილში გაძვირდა?

საქართველოში აპრილში თევზი გაძვირდა. უფრო კონკრეტულად, ახალი თევზის ფასი 24%-ით, ხოლო გაყინული თევზის 17.6%-ით გაიზარდა. ამის პარალელურად, მნიშვნელოვნად არის გაზრდილი იმპორტიც.

საქსტატის საგარეო ვაჭრობის მონაცემებით, 2026 წლის იანვარ-აპრილში საქართველოში $4.4 მილიონის ღირებულების 539 ტონა ახალი თევზი შემოვიდა. გასული წლის ანალოგიურ პერიოდში იმპორტი $2.2 მილიონის 259 ტონას შეადგენდა. შედეგად, იმპორტი ღირებულებაში 97.7%-ით, ხოლო მოცულობაში 108.1%-ით გაიზარდა.

ახალი თევზის მთავარი იმპორტიორი ქვეყანა თურქეთია, საიდანაც საქართველომ $3.1 მილიონის, 412 ტონა პროდუქცია შეიძინა. შემდეგ მოდიან ნორვეგია - $1.1 მილიონი, 97 ტონა და ჩილე - $129 ათასი, 18 ტონა. მცირე მოცულობით ახალი თევზი ასევე შემოვიდა სომხეთიდან, შრი-ლანკიდან, საფრანგეთიდან, ესპანეთიდან და ნიდერლანდებიდან.

რაც შეეხება გაყინულ თევზს, 2026 წლის პირველ ოთხ თვეში იმპორტმა $17.3 მილიონი და 5 153 ტონა შეადგინა. 2025 წლის ანალოგიურ პერიოდში მაჩვენებელი $13.8 მილიონი და 5 380 ტონა იყო. შესაბამისად, ღირებულებაში იმპორტი 24.8%-ით გაიზარდა, თუმცა მოცულობაში 4.2%-ით შემცირდა, რაც პროდუქტის გაძვირებაზე მიუთითებს.

გაყინული თევზის უმსხვილესი მომწოდებელი ჩილეა - $4.3 მილიონი და 668 ტონა. მას მოსდევს აშშ - $2.1 მილიონი, 708 ტონა; ესპანეთი - $1.2 მილიონი, 541 ტონა; ისლანდია - $1.1 მილიონი, 317 ტონა და დანია - $1 მილიონი, 279 ტონა.

იმპორტიორ ქვეყნებს შორის ასევე არიან ტაივანი (ჩინეთის პროვინცია), არგენტინა, ჩინეთი, ნორვეგია და ლატვია.