"სადგური" საქორწილო მიმართულებას უბრუნდება - სივრცე მომხმარებლებს სრულ სერვისს შესთავაზებს
ასურეთში მდებარე ტურისტული ობიექტი “სადგური” საქორწილო მიმართულებას უბრუნდება და მომხმარებლებს ღონისძიებების სრულ ორგანიზებას სთავაზობს.
როგორც ობიექტის დამფუძნებელმა რუსუდან ბარათაშვილი BMGTV-ის გადაცემა „ქალების ნარატივში“ განაცხადა, რამდენიმე წლიანი პაუზის შემდეგ სივრცემ ქორწილების მასპინძლობა კვლავ დაიწყო.
"პირველი წელი ვაკეთებდით ქორწილებს, შემდეგ აღარ ვაკეთებდით და ახლა გადავწყვიტეთ, რომ ისევ დაგვებრუნებინა ეს მიმართულება. უკვე გვქონდა ძალიან კარგი და სასიამოვნო ქორწილი", - განაცხადა რუსუდან ბარათაშვილმა.
მისივე თქმით, „სადგური“ ტრადიციული საქორწილო სივრცისგან განსხვავებულ გამოცდილებას ქმნის და აქცენტს ღია სივრცეზე, თავისუფალ გარემოსა და გასართობ აქტივობებზე აკეთებს.
"ეს უფრო მხიარული, თამაშებით სავსე ქორწილებია, ეზოში, ღია სივრცეში. ჩვენი ტერიტორია ამის შესაძლებლობას ნამდვილად იძლევა", - ამბობს ის.
დამფუძნებლის განმარტებით, ობიექტი მომხმარებლებს მხოლოდ სივრცეს არ სთავაზობს და ღონისძიებების სრულ ორგანიზებაში ერთვება, მათ შორის დეკორაციის, ყვავილების გაფორმების, მუსიკალური პროგრამისა და სხვადასხვა აქტივობის მიმართულებით.
"ქორწილი მთლიანად ჩვენით გავაკეთეთ - დეკორაციით, ყვავილებით და სხვა დეტალებით. ასურეთში ძალიან შემოქმედებითი ადამიანები არიან და მათთან ერთად ძალიან ლამაზ ღონისძიებებს ვაკეთებთ", - აღნიშნა რუსუდან ბარათაშვილმა.
მისივე ინფორმაციით, „სადგურს“ შეუძლია როგორც ქორწილების, ისე კორპორატიული ღონისძიებებისა და თიმბილდინგების სრული პაკეტის შეთავაზება. ამ დროისთვის სივრცეს დახურულ ნაწილში 200-მდე ადამიანის მიღება შეუძლია, ხოლო მთლიან ტერიტორიაზე, დაახლოებით 1000-მდე სტუმრის მასპინძლობა.
BM.GE
წყარო: bm.ge