საფონდო ბირჟის 35%-იანი კლება, ნავთობი $145-ზე - როგორია HSBC-ის პესიმისტური პროგნოზი?
HSBC-ის ხელმძღვანელობამ გეოპოლიტიკური რისკებით გამოწვეული გლობალური ეკონომიკური რეცესიის ყველაზე პესიმისტური სცენარი წარმოადგინა.
ბანკის ფინანსური დირექტორის, პემ კაურის განმარტებით, ახლო აღმოსავლეთში მიმდინარე კონფლიქტმა და ენერგომატარებლების მიწოდების შეფერხებამ შესაძლოა გლობალური საფონდო ინდექსების 35%-იანი კლება გამოიწვიოს. აღნიშნული პროგნოზი ინვესტორთა პესიმისტურ განწყობებსა და ეკონომიკის მკვეთრ შეკუმშვას ეფუძნება.
პარალელურად, ფინანსური ინსტიტუტი ნავთობის ფასის რეკორდულ ზრდასაც არ გამორიცხავს. წარმოდგენილი გათვლებით, ენერგეტიკული შოკის პირობებში ერთი ბარიერი ნავთობის ღირებულებამ შესაძლოა 145 დოლარს მიაღწიოს, რაც რეცესიის გამომწვევი მთავარი მიზეზი იქნება.
მნიშვნელოვანია ითქვას, რომ აღნიშნული მონაცემები HSBC-მა სესხების შესაძლო დანაკარგების რეზერვების შესაფასებლად გამოიყენა. მოსალოდნელი ინფლაციური წნეხისა და გაუარესებული ეკონომიკური პერსპექტივის გამო, ბანკმა საკრედიტო ზარალისა და გაუფასურების რეზერვები უკვე გაზარდა.
ცნობისთვის, HSBC-ის მიერ დასახელებული ნავთობის სავარაუდო ფასი იმ ისტორიულ მაქსიმუმებს უახლოვდება, რომლებიც ბაზარზე მიწოდების უკიდურესი დეფიციტის დროს დაფიქსირდა.
ზოგადად, მსგავსი სცენარების დამუშავება მსხვილი ფინანსური ორგანიზაციებისთვის სტანდარტული პროცედურაა, რაც მათ გრძელვადიანი რყევებისგან თავდაცვაში ეხმარება. აღნიშნული პროგნოზი წარმოადგენს ყველაზე უკიდურეს, ნეგატიურ სცენარს, რომლის გამართლების შანსი, HSBC-ის შეფასებით, საკმაოდ დაბალია.
BM.GE
წყარო: bm.ge