საფრანგეთი EU-ს პირველი ქვეყანა ხდება, რომელიც ჭარბი წონის საწინააღმდეგო მედიკამენტებს დააფინანსებს
საფრანგეთის ჯანდაცვის მინისტრმა სტეფანი რისტმა განაცხადა, რომ ივნისის შუა რიცხვებიდან სახელმწიფო მძიმე სიმსუქნით დაავადებული პაციენტებისთვის გამოწერილ წონის დასაკლებ მედიკამენტებს დააფინანსებს. საფრანგეთი ევროკავშირის პირველი ქვეყანაა, რომელიც მსგავს გადაწყვეტილებას იღებს.
რისტის შეფასებით, პროგრამის სრულად ამოქმედებისას, სახელმწიფოს წლიური ხარჯი დაახლოებით 100 მილიონ ევროს მიაღწევს. მისი თქმით, ამჟამად პაციენტები საფრანგეთში აღნიშნულ მედიკამენტებში თვეში საშუალოდ 300 ევროს იხდიან, თუმცა მას არ დაუკონკრეტებია, თუ რამდენი ადამიანი გადის ამჟამად მსგავს მკურნალობას.
"სამიზნე მოსახლეობა დაახლოებით ერთ მილიონ ადამიანს შეადგენს. თუმცა ეს არ ნიშნავს, რომ მკურნალობას ყველა მიიღებს, რადგან ეს ყოველთვის დამოკიდებულია ინდივიდუალურ შემთხვევასა და ექიმის დანიშნულებაზე", - აღნიშნა რისტმა ტელეარხ TF1-თან ინტერვიუში.
საფრანგეთის სოციალური დაცვის სისტემის მეშვეობით Wegovy-სა და Mounjaro-ს საინიექციო მკურნალობის დაფინანსება ხელმისაწვდომი მძიმე სიმსუქნის მქონე იმ პაციენტებისთვის იქნება, რომელთა სხეულის მასის ინდექსი (BMI) სულ მცირე 35-ია და აქვთ ერთი თანმხლები დაავადება მაინც, ან თუ მათი BMI თანმხლები დაავადებების მიუხედავად 40-ს აღწევს.
მინისტრის განმარტებით, პრეპარატები 65%-ით დაფინანსდება, თუმცა პრაქტიკაში, თანმხლები დაავადებების გამო, უფლებამოსილ პაციენტთა აბსოლუტური უმრავლესობა 100%-იანი დაფარვით ისარგებლებს.
"ეს ეხმაურება საზოგადოებრივი ჯანდაცვის მზარდ გამოწვევას და შესაბამისი თერაპიული მოვლის გადაუდებელ აუცილებლობას", - განუცხადა Reuters-ს Novo Nordisk France-ის გენერალურმა მენეჯერმა, ეტიენ ტიშიმ.
სიმსუქნის საწინააღმდეგო მედიკამენტები საფრანგეთში ექიმის დანიშნულებით 2024 წლიდანაა ხელმისაწვდომი.
შეგახსენებთ, რომ Novo Nordisk-მა და Eli Lilly-მ ჭარბის წონის საწინააღმდეგო მედიკამენტების ორალური (აბების) ვერსიები აშშ-ის მაღალკონკურენტულ ბაზარზეც ჩაუშვეს. გასულ კვირას ევროპის წამლის სააგენტომ Novo Nordisk-ის Wegovy-ს აბების დამტკიცებაზე რეკომენდაცია გასცა, რითაც მას ევროპაში წონის დასაკლები პირველი ორალური პრეპარატის სტატუსის მოპოვების გზა გაუხსნა.