"სამომავლოდ ამ ლიგაში ვხედავთ ჩვენს თავს" - "ევროკრედიტი" მიკრობანკის სტატუსის მიღებას განიხილავს

კომპანია „ევროკრედიტი“ მომავალში მიკრობანკის სტატუსის მიღებას სტრატეგიულ შესაძლებლობად განიხილავს. როგორც კომპანიის საოპერაციო დირექტორმა, სალომე გიორგბერიძემ განაცხადა, ეს არის სტრატეგიული გადაწყვეტილება, რაზეც კომპანია უკვე ფიქრობს და შესაბამის სამუშაოებსაც ატარებს. მათ შორის არის პორტფელის დივერსიფიცირება და ბიზნეს სესხების წილის ზრდა,

მისი თქმით, მიუხედავად იმისა, რომ გადაწყვეტილება ჯერ მიღებული არ არის, კომპანიის სამომავლო ხედვა სწორედ ამ მიმართულებით განვითარებას მოიცავს. ეს ნაბიჯი „ევროკრედიტს“ საშუალებას მისცემს, გააფართოოს მომსახურების არეალი და მომხმარებელს დამატებით მრავალფეროვანი ფინანსური პროდუქტები შესთავაზოს.

„ეს არის სტრატეგიული გადაწყვეტილება და ამას უცბად ვერ მივიღებთ. ძალიან კარგია ის, რომ კომპანია უკვე ფიქრობს ამასთან დაკავშირებით. ბუნებრივია, არის ძალიან ბევრი დეტალი, რომელიც ჩვენ უნდა გავიაროთ... რა თქმა უნდა, სამომავლოდ ამ ლიგაში აუცილებლად ვხედავთ ჩვენს თავს", - ამბობს „ევროკრედიტის“ საოპერაციო დირექტორი.

აღსანიშნავია, რომ საქართველოში უკვე ოპერირებს ორი მიკრო ბანკი: "კრისტალი" და "ემბისი".