"სამშენებლო კომპანიები კვალიფიციური კადრების დეფიციტს განიცდიან" - რევაზ სოხაძე
ინფრასტრუქტურის სამინისტროს ორგანიზებით, საქართველოში მოქმედი სამშენებლო კომპანიების წარმომადგენლებისა და კერძო და სახელმწიფო პროფესიული საგანმანათლებლო დაწესებულებების წარმომადგენლების სამუშაო შეხვედრა გაიმართა.
სამინისტროს ინფორმაციით, შეხვედრის მთავარი თემა იყო სამშენებლო სექტორში კვალიფიციური ადამიანური რესურსის დეფიციტი და ამ გამოწვევის დასაძლევად სახელმწიფოს, ბიზნესისა და პროფესიული განათლების სისტემის მჭიდრო თანამშრომლობა, კვალიფიციური კადრების ზრდა და მათი დასაქმება.
“დღეს სამშენებლო კომპანიები კვალიფიციური კადრების დეფიციტს განიცდიან, მიუხედავად იმისა, რომ ქვეყანაში არსებობენ პროფესიული სასწავლებლები, რომლებიც სწორედ ამ მიმართულებით ამზადებენ სპეციალისტებს. ჩვენი შეხვედრის მთავარი მიზანია ერთმანეთთან უფრო მჭიდროდ დავაკავშიროთ ბიზნესი და პროფესიული საგანმანათლებლო დაწესებულებები", - ამის შესახებ ინფრასტრუქტურის მინისტრმა რევაზ სოხაძემ ბიზნესისა და პროფესიული კოლეჯების შეხვედრის შემდეგ განაცხადა.
შეხვედრას საქართველოს ინფრასტრუქტურის მინისტრი რევაზ სოხაძე, საქართველოს განათლების, მეცნიერებისა და ახალგაზრდობის მინისტრის მოადგილე ბაია კვიციანი, პროფესიული განათლების განვითარების დეპარტამენტის უფროსი თამარ კვინიკაძე, სამშენებლო სექტორისა და პროფესიული საგანმანათლებლო დაწესებულებების წარმომადგენლები ესწრებოდნენ
BM.GE
წყარო: bm.ge