საქართველო-აზერბაიჯანის აგროსასურსათო ვაჭრობა სტაბილურად იზრდება - სონღულაშვილი
ბაქოში ვიზიტად მყოფი სოფლის მეურნეობის მინისტრი დავით სონღულაშვილი აცხადებს, რომ საქართველოს აზერბაიჯანთან აგროსასურსათო ვაჭრობის კუთხით დიდი პოტენციალი აქვს.
მისი თქმითვე, ბოლო წლებში სურსათის ექსპორტი აზერბაიჯანში სტაბილურად იზრდება.
სოფლის მეურნეობის სამინისტროს მიერ გავრცელებული ინფორმაციის თანახმად, ვიზიტის ფარგლებში, სონღულაშვილი აზერბაიჯანის სოფლის მეურნეობის მინისტრს მაჯნუნ მამედოვს შეხვდა და ორ ქვეყანას შორის სოფლის მეურნეობასა და აგროსასურსათო სექტორში თანამშრომლობის პერსპექტივები განიხილა.
„შეხვედრაზე განვიხილეთ აგროსასურსათო სექტორში თანამედროვე მიდგომების დანერგვისა და ღირებულებათა ჯაჭვების განვითარების მიმართულებებით თანამშრომლობა და ერთობლივი პროექტების განხორციელების შესაძლებლობები. საქართველო-აზერბაიჯანს შორის აგროსასურსათო ვაჭრობა სტაბილურად იზრდება და არსებობს მნიშვნელოვანი პოტენციალი მისი შემდგომი გაფართოებისთვის“, - განაცხადა სონღულაშვილმა.
2025 წელს, საქართველოდან აზერბაიჯანში ექსპორტირებულია 207.6 მლნ დოლარის ღირებულების აგროსასურსათო პროდუქცია, რაც 19%-ით აღემატება 2024 წლის მაჩვენებელს.
ამას გარდა, შარშან აგროსასურსათო პროდუქციის მთლიან ექსპორტში აზერბაიჯანის წილი 11% იყო. ამავე პერიოდში, აზერბაიჯანიდან საქართველოში იმპორტირებულია 99 მლნ დოლარის ღირებულების აგროსასურსათო პროდუქცია, რაც 2024 წლის ანალოგიურ მაჩვენებელს 36%-ით აღემატება.