საქართველოდან ალჟირში საკლავი ცხვრის ექსპორტი შესაძლებელი გახდა - ბრძანება

საქართველოდან ალჟირის სახალხო დემოკრატიულ რესპუბლიკაში საკლავი ცხვრის ექსპორტისთვის საჭირო ვეტერინარული სერტიფიკატის ფორმა დამტკიცდა. შესაბამის ბრძანებას ხელი გარემოს დაცვისა და სოფლის მეურნეობის მინისტრმა 11 მაისს მოაწერა.

ახალი რეგულაციის თანახმად, ნორმატიულ აქტს დაემატა სპეციალური ქვეპუნქტი და დანართი რომელიც განსაზღვრავს იმ ვეტერინარულ მოთხოვნებს, რასაც ქართული ცხვარი ალჟირის ბაზარზე მოსახვედრად უნდა აკმაყოფილებდეს.

საკლავი ცხოველების ექსპორტი ვეტერინარული სერტიფიკატის გარეშე შეუძლებელია. აღნიშნული დოკუმენტი ადასტურებს, რომ ცხოველი ჯანმრთელია, ვაქცინირებულია და აკმაყოფილებს იმ ქვეყნის სანიტარიულ ნორმებს, სადაც მისი გაყვანა ხდება.

მინისტრის ბრძანება უკვე ამოქმედდა.

აღსანიშნავია, რომ წელს პირველ კვარტალში საქართველომ ცხვრის ექსპორტიდან 6.9 მლნ აშშ დოლარის შემოსავალი მიიღო.გასული წლის ანალოგიურ პერიოდთან შედარებით ექსპორტის მოცულობა 111%-ით გაიზარდა.

• მთავარი საექსპორტო ბაზარი საუდის არაბეთი იყო - 3.5 მლნ აშშ დოლარი • ყატარი - 1.6 მლნ აშშ დოლარი; • ლიბია - 1.01 მლნ აშშ დოლარი • ქუვეითი - 494 ათასი აშშ დოლარი.