საქართველოში ინფლაცია ეტაპობრივად 3%-იან სამიზნე ნიშნულამდე შემცირდება - Fitch-ის პროგნოზი

სარეიტინგო სააგენტო Fitch Ratings-ის შეფასებით, საქართველოში ინფლაცია მომდევნო თვეებში კვლავ მაღალ დონეზე შენარჩუნდება, თუმცა შემდგომ ეტაპობრივად შემცირდება და საქართველოს ეროვნული ბანკის 3%-იან სამიზნე მაჩვენებელს მიუახლოვდება.

Fitch-ის ანგარიშის მიხედვით, 2026 წლის აპრილში ინფლაცია 5.9%-მდე გაიზარდა, რაც ძირითადად ენერგომატარებლების ფასების მკვეთრმა ზრდამ გამოიწვია.

სააგენტოს ინფორმაციით, ინფლაციურ შოკზე საპასუხოდ, საქართველოს ეროვნულმა ბანკმა მაისის დასაწყისში მონეტარული პოლიტიკის განაკვეთი 25 საბაზისო პუნქტით, 8.25%-მდე გაზარდა და მომდევნო თვეებში დამატებითი გამკაცრების შესაძლებლობაზეც მიანიშნა.

Fitch-ის შეფასებით, მიუხედავად გაზრდილი ინფლაციისა, რეალური საპროცენტო განაკვეთები კვლავ პოზიტიურ ნიშნულზე რჩება, რაც ლარის გაუფასურებისა და მეორადი ინფლაციური ეფექტების რისკებს ამცირებს.

შეგახსენებთ, სარეიტინგო სააგენტო Fitch Ratings-მა საქართველოს სუვერენული რეიტინგი „BB“-ზე, სტაბილური პერსპექტივით დაადასტურა. სააგენტოს შეფასებით, ქვეყნის ეკონომიკა კვლავ ძლიერ ზრდას ინარჩუნებს, თუმცა ერთ-ერთ მთავარ გამოწვევად ინფლაციის დაჩქარება და გარე რისკები რჩება.