საქართველოსთან ურთიერთობების ნორმალიზებისკენ მივისწრაფვით - ზელენსკი
უკრაინის პრეზიდენტი ვოლოდიმირ ზელენსკი საქართველოსთან ურთიერთობის ნორმალიზების მზაობას გამოთქვამს. სხვა საკითხებთან ერთად, საქართველოზე ზელენსკიმ უკრაინის საგარეო საქმეთა მინისტრთან ანდრი სიბიჰასთან ისაუბრა.
"ანდრი სიბიჰამ მომახსენა საქართველოს საგარეო საქმეთა მინისტრთან კომუნიკაციის შესახებ. ჩვენ ვცდილობთ ურთიერთობების ნორმალიზებასა და თანამშრომლობას ურთიერთპატივისცემისა და ურთიერთგაძლიერების საფუძველზე და მზად ვართ, ამ მიმართულებით გადავდგათ ნაბიჯები“, - წერს ზელენსკი X-ზე.
15 მაისს მოლდოვაში მიმდინარე ევროპის საბჭოს მინისტრთა კომიტეტის 135-ე სესიის ფარგლებში, საგარეო საქმეთა მინისტრი მაკა ბოჭორიშვილი სიბიჰას შეხვდა.
საქართველოს საგარეო საქმეთა სამინისტროს მიერ გავრცელებული ინფორმაციით, შეხვედრის ფარგლებში საუბარი შეეხო საქართველოს მხრიდან უკრაინის მიმართ თანმიმდევრულ პოლიტიკურ და ჰუმანიტარულ მხარდაჭერას. ამასთან, ქართულმა მხარემ ხაზი გაუსვა საქართველო-უკრაინის ურთიერთობებში არსებულ გამოწვევებს, უკრაინის ხელისუფლების მხრიდან ბოლო წლებში გადადგმულ ნაბიჯებს და იმ პოზიციებს, რაც აბრკოლებს ქვეყნებს შორის ურთიერთობების ნორმალიზებას. მხარეებმა დაადასტურეს დიპლომატიური ურთიერთობების გაჯანსაღების მნიშვნელობა და დიალოგის გაგრძელების მზაობა.
BM.GE
წყარო: bm.ge