სასუქებისა და პესტიციდების ფასებში უხეში ჩარევა ბაზრისთვის დამანგრეველი იქნება - "კარტლისი"
სასუქებისა და პესტიციდების ფასებში უხეში ჩარევა ბაზრისთვის დამანგრეველი იქნება - ამის შესახებ BMG-სთან აგრომაღაზია „კარტლისის“ დირექტორი რობერტ რევია კონკურენციის სააგენტოს მიერ ბაზრის მოკვლევის შესაძლო დაწყების საკითხზე აცხადებს.
მისი თქმით, თუ მოგებიანობა ხელოვნურად შეიზღუდება, ინვესტორი ამ მცირე ბაზარზე აღარ შემოვა და წლების განმავლობაში ნაშენები ინფრასტრუქტურა და ცოდნის გადაცემის ჯაჭვი დაიშლება.
აგროქიმიკატებისა და პესტიციდების ბაზარი კონკურენციის ეროვნული სააგენტოს დაკვირვების ფოკუსში მას შემდეგ მოექცა, რაც მთავრობამ სასუქებსა და პესტიციდებზე სავარაუდოდ, მაღალი ფასნამატის შესახებ განაცხადა და ბაზრის შესწავლის რეკომენდაცია გასცა. კონკურენციის სააგენტოს მონიტორინგის შუალედური ანგარიშის თანახმად კი, ბაზარზე იკვეთება დომინანტური ძალები, რომლებიც, რიგ შემთხვევებში, 40%-ზე მეტ წილს ფლობენ და პროდუქციას 100%-იანი ფასნამატით ყიდიან.
დარგის ერთ-ერთი მსხვილი მოთამაშის, კომპანია „კარტლისის“ დირექტორის განმარტებით კი, საუბარი იმაზე, რომ ბაზარზე რომელიმე კომპანია 40%-იან წილს ფლობს, სიმართლეს არ შეესაბამება და არსებულ კონკურენტულ გარემოში ეს პრაქტიკულად შეუძლებელია.
„ძალიან ბევრი კომპანიაა წარმოდგენილი ამ ბაზარზე - ადგილობრივი კომპანიები, დისტრიბუტორები, ასევე, უამრავი მწარმოებელი მთელი მსოფლიოდან. იმ მონაცემებით, რაც მე მაქვს, არცერთი კომპანია ბაზრის ამხელა წილს ვერ ფლობს დღეს არსებულ პირობებში. ამიტომ დომინანტი ვერავინ იქნება ისე, რომ რაღაც ფასებს კარნახობდეს ან განსაკუთრებული ფასები ჰქონდეს ბაზარზე.
თუმცა, ჩვენ, მაგალითად, გვაქვს რაღაც პროდუქტები, რომელიც ჩვენთვის კომერციულად საინტერესო არ არის, იმის გამო, რომ ძალიან მცირე რაოდენობით იყიდება, მაგრამ არსებობს რაღაც ნიშა, ვიღაცას სჭირდება ეს პროდუქტი იმისთვის, რომ გარკვეული კულტურა მოიყვანოს და საერთოდ რომ არ შემოიტანო, მაშინ ის მიმართულება ჩავარდება ხომ? მაგრამ მეორე მხრივ, როდესაც რაღაც შემოგაქვს ძალიან მცირე რაოდენობით, ბუნებრივია იმის ხარჯები ძალიან იზრდება. ამას ბაზარი განსაზღვრავს“ - ამბობს რობერტ რევია BMG-სთან.