საწვავის გაძვირების გამო, ავიაკომპანიებმა მაისში 13,000 რეისი გააუქმეს

ახლო აღმოსავლეთში მიმდინარე კონფლიქტის გამო, საავიაციო საწვავის ფასი მკვეთრად გაიზარდა, რამაც გლობალურ ბაზარზე ფრენების რაოდენობის დრამატული შემცირება გამოიწვია. მხოლოდ მაისის თვეში ავიაკომპანიებმა 13,000 რეისი გააუქმეს, რის შედეგადაც ბაზარს ორი მილიონი სამგზავრო ადგილი დააკლდა. საწვავის გამო, ფრენების ყველაზე დიდი კლება სტამბოლისა და მიუნხენის აეროპორტებში დაფიქსირდა.

საავიაციო საწვავის ღირებულება ომის დაწყების შემდეგ გაორმაგდა. თუ თებერვლის ბოლოს ერთი ტონა ნავთობპროდუქტი $831 დოლარი ღირდა, აპრილის დასაწყისში ფასმა $1 838 დოლარს მიაღწია. შექმნილი ვითარების გამო, Air France-მა, KLM-მა, Air Canada-მ, Delta-მ და SAS-მა ზაფხულის განრიგი უკვე შეამცირეს. გერმანულმა ჯგუფმა Lufthansa-მ კი განაცხადა, რომ ოქტომბრის ბოლომდე საერთო ჯამში 20,000 რეისს გააუქმებს.

ენერგეტიკის საერთაშორისო სააგენტოს ხელმძღვანელმა აპრილის შუა რიცხვებში ევროპული ქვეყნები მოსალოდნელი დეფიციტის შესახებაც გააფრთხილა. მისი შეფასებით, ევროპას საავიაციო საწვავის მხოლოდ ექვსი კვირის მარაგი აქვს დარჩენილი.

შეგახსენებთ, რომ ავიაკომპანიები, როგორც წესი, რეისების გაუქმებას ერიდებიან, რადგან აეროპორტებში სლოტების შენარჩუნება პირდაპირ არის დამოკიდებული ფრენების განხორციელების სიხშირეზე. თუმცა, საწვავის კრიზისიდან გამომდინარე, საერთაშორისო ბაზარზე საგანგებო გეგმები ამოქმედდა და ახლა კომპანიები არა დომინაციისთვის, არამედ გაკოტრებისგან გადარჩენისთვის იბრძვიან.