Saudi Aramco-ს მოგება მოსალოდნელზე მეტად გაიზარდა

ჰორმუზის სრუტეში მიმდინარე სამხედრო კონფლიქტისა და მიწოდების შეფერხების ფონზე, ენერგოგიგანტ Saudi Aramco-ს წმინდა მოგება პირველ კვარტალში 25%-ით გაიზარდა.

როგორც ირკვევა, კომპანიამ $32.5 მილიარდის შემოსავალი მიიღო, რითაც ანალიტიკოსების მიერ პროგნოზირებულ $30.95-მილიარდიან მაჩვენებელს გადააჭარბა. თუ გასული წლის ანალოგიურ პერიოდში კომპანიის შემოსავალმა $108 მილიარდი შეადგინა, ამჯერად მთლიანი შემოსავალი 7%-ით გაიზარდა და $115.5 მილიარდს მიაღწია. ფინანსური მაჩვენებლების ზრდა ნედლ ნავთობზე, ნავთობპროდუქტებსა და ქიმიურ ნივთიერებებზე ფასებისა და გაყიდვების მოცულობის მატებით არის განპირობებული.

როგორც ირკვევა, ირანის მიერ ჰორმუზის სრუტის ბლოკირების საპასუხოდ, Saudi Aramco-მ ნედლი ნავთობის ნაკადები აღმოსავლეთ სანაპიროდან წითელი ზღვის პორტ იანბუში გადაამისამართა. კომპანიის აღმასრულებელი დირექტორის, ამინ ნასერის განცხადებით, „აღმოსავლეთ-დასავლეთის“ მილსადენმა დღეში 7 მილიონი ბარელის მაქსიმალურ გამტარუნარიანობას მიაღწია.

მნიშვნელოვანია ითქვას, რომ კომპანიამ პირველი კვარტალისთვის $21.9 მილიარდის ოდენობის საბაზისო დივიდენდი გამოაცხადა, რაც წინა წელთან შედარებით 3.5%-ით მეტია. 2026 წლისთვის Saudi Aramco ჯამურად $87.6 მილიარდის დივიდენდის გაცემას გეგმავს. საუდის არაბეთის სახელმწიფო ბიუჯეტის დეფიციტის დაფარვა და შიდა ხარჯების დაფინანსება მნიშვნელოვანწილად სწორედ კომპანიის დივიდენდებზეა დამოკიდებული.

რაც შეეხება რეაქციას საფონდო ბირჟაზე, ბოლო სავაჭრო სესიაზე Saudi Aramco-ს აქციების ფასი სტაბილურობას ინარჩუნებდა. ამჟამად კომპანიის კაპიტალიზაცია დაახლოებით $1.8 ტრილიონს შეადგენს.