საზოგადოებრივი მაუწყებლის სამეურვეო საბჭოს შესარჩევი საკონკურსო კომისია უქმდება - ცვლილებები რეგლამენტში
საქართველოს პარლამენტის რეგლამენტში დაგეგმილი დაჩქარებული ცვლილებების ფარგლებში, საზოგადოებრივი მაუწყებლის სამეურვეო საბჭოს წევრების (მეურვეების) არჩევის პროცედურა მნიშვნელოვნად იცვლება და მარტივდება.
უქმდება საკონკურსო კომისია: მოქმედი წესისგან განსხვავებით, სრულად უქმდება სპეციალური საგამოცდო/შემრჩევი საკონკურსო კომისიის შექმნის აუცილებლობა, რომელიც მანამდე მეურვეობის კანდიდატებს არჩევდა.
სამეურვეო საბჭოს წევრობის კანდიდატებს მათი წარდგენის უფლებამოსილების მქონე სუბიექტები (მაგალითად: საპარლამენტო უმრავლესობა, ოპოზიცია, სახალხო დამცველი) პირდაპირ, საკუთარი შეხედულებისამებრ შეარჩევენ და წარადგენენ პარლამენტში.
წარდგენილი კანდიდატების დოკუმენტაციის შესწავლა, მათი კანონთან შესაბამისობის შემოწმება და საჯარო მოსმენა პარლამენტის ეკონომიკური პოლიტიკის კომიტეტს ევალება. სწორედ ეს კომიტეტი გასცემს საბოლოო რეკომენდაციას კანდიდატის მეურვედ არჩევის ან არჩევაზე უარის თქმის შესახებ.
როგორც საკანონმდებლო ცვლილებების განმარტებით ბარათშია აღნიშნული, რეფორმის მიზანი საპარლამენტო პროცედურების დაზუსტება, გამარტივება და საქმიანობის ეფექტიანობის გაზრდაა.
პარლამენტი აღნიშნულ პროექტს დაჩქარებული წესით იხილავს, რათა მისი მიღება საშემოდგომო სესიისთვის არ გადაიდოს. ცვლილებები ძალაში 2026 წლის 1 ივლისიდან უნდა შევიდეს.
კანონპროექტის ავტორები და ინიციატორები პარლამენტის თავმჯდომარე შალვა პაპუაშვილი და უმრავლესობის დეპუტატები არიან.
ძველი ნორმით, ვაკანსიის გაჩენისას პარლამენტის თავმჯდომარე გამოსცემდა ბრძანებას კონკურსის შესახებ, რის შემდეგაც პარლამენტი 9 წევრისგან შემდგარ სპეციალურ საკონკურსო კომისიას ქმნიდა. კომისიაში სამოქალაქო საზოგადოებისა და აკადემიური წრეების წარმომადგენლები შედიოდნენ.