"სებს სხვა გამოსავალი არ ჰქონდა, მოსალოდნელი იყო" - არჩილ იაკობაშვილი რეფინანსირების განაკვეთის ზრდაზე

ფინანსისტი არჩილ იაკობაშვილი ამბობს, რომ საქართველოს ეროვნული ბანკის მიერ პოლიტიკის გამკაცრება მოსალოდნელი იყო. მან ამის შესახებ "ანალიტიკას" ეთერში განაცხადა.

დღეს, ეროვნული ბანკის მონეტარული პოლიტიკის კომიტეტმა რეფინანსირების განაკვეთი 0.25 პროცენტული პუნქტით 8,25%-მდე გაზარდა. სებ ამ გადაწყვეტილებას ახლო აღმოსავლეთში დაწყებულ ომს და მისგან გამომდინარე ინფლაციურ წნეხს უკავშირებს, რადგან აპრილში ინფლაცია 5.9%-მდე გაიზარდა, რაც ბოლო ორი წლის მაქსიმალური მაჩვენებელია. ეს 2024 წლის 22 მაისის შემდეგ რეფინანსირების განაკვეთის ზრდის პირველი გადაწყვეტილებაა.

ფინანსისტმა განმარტა, რომ განაკვეთის ზრდის საჭიროება დღის წესრიგში მარტის და აპრილის ინფლაციის ფონზე დადგა, რაც თავის მხრივ, უმეტესად იმპორტიდან მომდინარე წნეხს უკავშირდებოდა.

"ეროვნულ ბანკს სხვა გამოსავალი არ ჰქონდა. მოსალოდნელი იყო მსგავსი გადაწყვეტილება. მანამდე თუ 7% იყო ნეიტრალური განაკვეთი და ზომიერად ჰქონდათ გამკაცრებული მონეტარული პოლიტიკა, 8%-ის დონეზე, მარტსა და აპრილში ინფლაციის შედეგად უკვე 8%-ის ნიშნულზე მოიმატა ნეიტრალურმა განაკვეთმა. ამიტომაც დადგა განაკვეთის გაზრდა დღის წესრიგში",- განმარტავს ფინანსისტი.

ამასთან, ის მიიჩნევს, რომ სებს გასულ წელს შეეძლო ისეთი ნაბიჯების გადადგმა, რაც უკვე მიმდინარე პერიოდში იმპორტის კომპონენტის ზეწოლას შეამსუბუქებდა.

"2025 წელს ლარის გამყარება უფრო მეტად იყო შესაძლებელი, რეზერვების ასეთი დიდი რაოდენობით შევსების ფონზე, რაც ეროვნულმა ბანკმა, სამწუხაროდ, არ გააკეთა",- განაცხადა არჩილ იაკობაშვილმა.