სერხიო რამოსის კონსორციუმის ჯგუფმა “სევილია” 444 მილიონ ევროდ შეიძინა

სერხიო რამოსის ხელმძღვანელობით მოქმედმა კონსორციუმმა, რომელიც Five Eleven ფონდის მხარდაჭერითაა შექმნილი, პრინციპულ შეთანხმებას მიაღწია მისი ბავშვობის კლუბის “სევილიას” შესაძენად. გარიგების ღირებულება დაახლოებით 444 მილიონ ევროს შეადგენს.

40 წლის რამოსი იმ ჯგუფის საჯარო სახეა, რომელმაც იანვარში სამთვიანი ექსკლუზიური პერიოდი მიიღო, რათა ლა ლიგაში გავარდნის საფრთხის წინაშე მდგომი კლუბი შეეძინა.

მოლაპარაკებებთან დაახლოებულმა წყაროებმა, რომლებმაც ანონიმურობის დაცვა ითხოვეს, დაადასტურეს, რომ სამშაბათს მიღწეულ იქნა პრინციპული შეთანხმება 444 მილიონ ევროზე. ამას წინ უძღოდა ფინანსური შემოწმება და აქციონერებთან ხანგრძლივი მოლაპარაკებები, რომლებიც ორშაბათს 8-10 საათის განმავლობაში მიმდინარეობდა.

გარიგების საბოლოოდ დახურვა სავარაუდოდ მაისის ბოლოს ან ივნისის დასაწყისში იგეგმება. წყაროების ინფორმაციით, კონსორციუმს ახლა საჭირო კაპიტალის ოფიციალურად წარმოდგენა მოუწევს, თუმცა ფინანსური გარანტია უკვე წარდგენილია.

იანვარში გავრცელებული ინფორმაციით, კლუბის შესყიდვა დამოკიდებული იყო „სევილიას“ ფინანსური მდგომარეობის დეტალურ ანალიზზე. მთავარი გაურკვევლობა კლუბის ვალს ეხებოდა, რომელიც კლუბთან დაახლოებული წყაროების თქმით, შესაძლოა დაახლოებით 180 მილიონ ევროს აღწევდეს. ამის დასადგენად მყიდველებმა გარე აუდიტიც შეუკვეთეს.

თუმცა, კლუბის წარმომადგენლებმა The Athletic-ს ანონიმურად განუცხადეს, რომ რეალური წმინდა ვალი დაახლოებით 90 მილიონ ევროს შეადგენს და ეს თანხა საბოლოო ფასიდან უნდა გამოიქვითოს.

„სევილიას“ ფინანსური მდგომარეობა ბოლო წლებში მნიშვნელოვნად გაუარესდა. 2023-24 სეზონში კლუბის ზარალმა 81.8 მილიონი ევრო შეადგინა. თუ გუნდი სეგუნდადივიზიონში დაქვეითდება, კლუბის ღირებულება, შეფასებით, დაახლოებით 25-30 პროცენტით შემცირდება.

ამჟამად „სევილია“ ლა ლიგაში მე-13 ადგილზეა და სეზონის დასრულებამდე სამი ტურით ადრე გასავარდნ ზონას მხოლოდ სამი ქულით უსწრებს.