Shein-ი ტანსაცმლის ეკომეგობრულ ბრენდ Everlane-ს $100 მილიონად შეისყიდის

სწრაფი მოდის ჩინური კომპანია Shein-ი ეკომეგობრული ტანსაცმლის მწარმოებელი Everlane-ის შესყიდვას დასთანხმდა.

ამის შესახებ Everlane-ის აღმასრულებელმა დირექტრომა, ალფრენდ ჩენგმა ისაუბრა და აღნიშნა, რომ შერწყმა კომპანიას მომხმარებლებთან უფრო ახლოს მისვლის და გლობალური გაფართოების შესაძლებლობას მისცემს.

საქმე ისაა, რომ Everlane მწვანე, ეკომეგობრული, მდგრადი ბრენდია, რომელიც თავისი მიწოდების ჯაჭვის გამჭვირვალობით ამაყობს. Shein-ი კი სწრაფი მოდის კომპანიაა, რაც, თავის მხრივ, მასობრივ წარმოებას, დაბალ ხარისხსა და გარემოს დამაზიანებელ პრაქტიკებს გულისხმობს.

ჩენგის თქმით, გარიგების მიუხედავად, Everlane "დამოუკიდებელ ბრენდად გააგრძელებს ფუნქციონირებას და შეინარჩუნებს ერთგულებას თავისი დიდი ხნის წინ ჩამოყალიბებული ბრენდის ღირებულებების, მდგრადობის ვალდებულებებისა და გამორჩეული ხარისხის მიმართ".

გარიგების ფინანსური დეტალები ოფიციალურად არ გახმაურებულა, თუმცა საერთაშორისო მედიები $100-მილიონიან შეთანხმებაზე საუბრობენ.

აღსანიშნავია, რომ მიუხედავად კრიტიკისა, რასაც Shein-ი თავისი სოციალური და გარემოსდაცვითი გავლენის გამო აწყდება, ელექტრონული კომერციის ჩინურ გიგანტს საკუთარი მდგრადობის პროგრამებიც აქვს შემუშავებული.

გარიგებას ორივე მხარისთვის აქვს დადებითი მხარეები. GlobalData-ს მმართველი დირექტორის, ნილ სონდერსის თქმით, Everlane-ის შეძენა Shein-ს დაეხმარება, სწრაფი მოდის სფეროსა და თავის ჩვეულებრივ, ბიუჯეტურ შეთავაზებებს გასცდეს.

"Everlane არ არის რევოლუციური ნაბიჯი Shein-ისთვის, მაგრამ ის ქმნის ნარატივს, რომ კომპანიას უფრო დაბალანსებული პორტფელი აქვს, რისი გაყიდვაც პოტენციურ ინვესტორებზე მომავალში პირველადი საჯარო შეთავაზების (IPO) დროს იქნება შესაძლებელი", - აღნიშნა მან.

მიუხედავად ამისა, კვლავ რჩება კითხვები იმის შესახებ, თუ რა ბედი ეწევა Everlane-ს Shein-ის მფლობელობაში. ამ გაერთიანებამ, შესაძლოა, შელახოს Everlane-ის იმიჯი იმ მომხმარებლების თვალში, რომლებსაც მისი მდგრადობის პოლიტიკა იზიდავდა.