"შევთანხმდით, რომ ცოტა ხანში გვექნება შეხვედრა" - მაკა ბოჭორიშვილი ანდრეი სიბიგასთან საუბარზე

საგარეო საქმეთა მინისტრმა, მაკა ბოჭორიშვილმა "იმედის" ეთერში უკრაინის საგარეო საქმეთა მინისტრ ანდრეი სიბიგასთან მის სატელეფონო კომუნიკაციაზე ისაუბრა და პოზიტიურად შეაფასა ინიციატივა, რომელიც "მოდის უკრაინული მხარისგან".

როგორც ბოჭორიშვილმა თქვა, შეთანხმდნენ რომ მალე გაიმართება შეხვედრაც.

"ნამდვილად, გააქტიურდა უკრაინული მხარე საქართველოსთან კომუნიკაციაში. დღესაც შედგა სატელეფონო საუბარი უკრაინელ კოლეგასთან. შევთანხმდით, რომ გავაგრძელებთ ურთიერთობას, საუბარს. მართლაც არის საკითხები, რომლებიც დაგროვილია დღის წესრიგში. ძალიან დიდი ხნის განმავლობაში უკრაინული მხარე საქართველოს და ქართულ საზოგადოებას სოციალური ქსელებით ესაუბრებოდა და თან არცთუ ისე სასიამოვნო გზავნილები გვესმოდა, რაც შეუძლებელია, გვერდით გადავდოთ. მნიშვნელოვანია, ერთი, რომ ინიციატივა მოდის უკრაინული მხარისგან, რომ დავსხდეთ და ვისაუბროთ საკითხებზე, რაც უკვე შეიძლება განვიხილოთ, როგორც პოზიტიური ნაბიჯი. მეორეს მხრივ, ჩვენი მხრიდანაც მნიშვნელოვანია, რომ ამ წლების განმავლობაში გარკვეული საკითხები რაც დაგროვდა ურთიერთობებში, უკრაინული მხარისგან იყოს სწორად გაგებული ისე, როგორც გავიგეთ ჩვენ, ქართულმა საზოგადოებამ, საქართველოს ხელისუფლებამ და გავაგრძელოთ ურთიერთობა. შევთანხმდით, რომ ცოტა ხანში გვექნება შეხვედრა და შევძლებთ ყველაფერზე მსჯელობას, რაც შეიძლება გაკეთდეს იმისათვის, რომ ორი ქვეყნის ურთიერთობები დაბრუნდეს ნორმის ჩარჩოებში", - განაცხადა ბოჭორიშვილმა.

მაკა ბოჭორიშვილი უკრაინის საგარეო საქმეთა მინისტრს ესაუბრა

შევთანხმდით უკრაინა-საქართველოს ურთიერთობების ნორმალიზების ორმხრივ ინტერესზე - ანდრეი სიბიგა მაკა ბოჭორიშვილთან შეხვედრაზე