"შინარი" წლის ბოლომდე ფიზიკური მაღაზიის გახსნას გეგმავს - რას სთავაზობს კომპანია მომხმარებელს?
„შინარი“ მიმდინარე წლის ბოლომდე თბილისში პირველი ფიზიკური მაღაზიის გახსნას გეგმავს. ამის შესახებ BM.GE-ს კომპანიის თანადამფუძნებელმა მარიამ გურგულიანმა განუცხადა.
ბრენდი, რომელიც ბაზარზე 2025 წლის ნოემბრიდან გამოჩნდა, მარიამ გურგულიანისა და ნიკოლოზ ჯაჭვაძის პროექტია. „შინარი“ 5 000-ლარიანი საწყისი ინვესტიციით შეიქმნა და მომხმარებლებს სახლში დამზადებულ ნატურალურ პროდუქტებს ონლაინ სთავაზობს. როგორც დამფუძნებლები ამბობენ, იდეა იმ სურვილიდან გაჩნდა, რომ ადამიანებისთვის ის გემოები დაებრუნებინათ, რომლებიც ნამდვილ, „სახლურ“ პროდუქტებთან ასოცირდება.
მარიამ გურგულიანი ვარაუდობს, რომ კომპანიის პირველი ფიზიკური სივრცე დედაქალაქში, ხალხმრავალ და ტურისტულად აქტიურ ლოკაციაზე განთავსდება, რადგან მომხმარებლების ნაწილი პროდუქტის ადგილზე გასინჯვასა და ბრენდთან უშუალო კომუნიკაციას ითხოვს.
„გვინდოდა, მომხმარებლისთვის ისეთი პროდუქტი შეგვეთავაზებინა, რომელიც ნამდვილად სახლურად მზადდება. ჩვენ არ ვართ საწარმო-ქარხანა, სადაც ყველაფერი სტანდარტულად იწარმოება. გვინდოდა, ადამიანებისთვის ის ნატურალური გემო დაგვებრუნებინა, რომელიც დღეს ძალიან ენატრებათ.
ახლა კი ვაპირებთ, ფიზიკური მაღაზია გავხსნათ, რაც მომხმარებელთან კიდევ უფრო მჭიდრო ურთიერთობის საშუალებას მოგვცემს. გვინდა, ობიექტი ხალხმრავალ, ტურისტულად აქტიურ ლოკაციაზე განთავსდეს, რადგან ბევრს პროდუქტის ადგილზე გასინჯვა ურჩევნია. ეს ამ ეტაპზე ჩვენი მთავარი პრიორიტეტია“, - ამბობს მარიამ გურგულიანი.
დღეს „შინარის“ ასორტიმენტი აერთიანებს სვანეთიდან ჩამოტანილ ქართულ სუნელებს, კახურ ზეთს, თაფლსა და სხვადასხვა ხელნაკეთ საკმაზს. პროექტის კონცეფციაც დამფუძნებლების წარმომავლობას უკავშირდება - მარიამ გურგულიანი სვანეთიდანაა, ნიკოლოზ ჯაჭვაძე კი კახეთიდან.
"კონცეფციურად გადავწყვიტეთ, რომ მომხმარებლისთვის საქართველოს ორი განსხვავებული კუთხიდან შეგვეთავაზებინა პროდუქცია - სუნელები სვანეთიდან ჩამოგვაქვს, კახური ზეთი კი ქიზიყიდან.