შსს-მ გელა მთივლიშვილზე თავდასხმის ფაქტზე გამოძიება ძალადობის მუხლით დაიწყო

შინაგან საქმეთა სამინისტრომ „მთის ამბების“ რედაქტორზე, გელა მთივლიშვილზე მომხდარი თავდასხმის ფაქტზე გამოძიება დაიწყო. უწყებაში bm.ge-ს უთხრეს, რომ საქმეზე მოკვლევა სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.

ინციდენტი "ფორმულაზე" სატელევიზიო ეთერის დასრულების შემდეგ მოხდა. ჟურნალისტი თავდასხმაში მცირე და საშუალო ჰესების ასოციაციის ხელმძღვანელს, გიორგი მარგებაძეს ადანაშაულებს.

ჟურნალისტმა მომხდარის შესახებ ინფორმაცია სოციალურ ქსელში გაავრცელა და აღნიშნა, რომ მას ფიზიკური დაზიანებები აქვს მიყენებული.

„ეთერიდან გამოსვლისთანავე თავს დამესხა ჰესების ლობისტი, „ქართული ოცნების“ მოძველბიჭო ელემენტი მარგებაძე. სახე მაქვს დაზიანებული. მივედი პოლიციაში. პასუხს აგებს!“ - წერს მთივლიშვილი.

ბრალდებებს „ფეისბუქის“ პირადი გვერდიდან უპასუხა გიორგი მარგებაძემ. ის ფიზიკური დაპირისპირების ფაქტს ადასტურებს, თუმცა ამტკიცებს, რომ ეს ჟურნალისტის მხრიდან პროვოკაციას მოჰყვა.

„დასრულდა ეთერი; გამომიწვიეთ, გაგინეთ ორივეს, დასარტყმელად გამოიქაჩე – დაგასწარი. ჰესები? დიახ! რაც შეიძლება მეტი ჰესი ჩვენი ქვეყნის წარმატებისთვის!!!“ - ნათქვამია მარგებაძის პოსტში.

გადაცემით თემა რაჭაში, ზაზა ფაჩულიას "სადმელი ჰესის" მშენებლობას ეხებოდა. შეგახსენებთ, "სადმელი ჰესის“ სიმძლავრე 2.7 მგვტ იქნება, წლიური გამომუშავება კი 19.2 მლნ კვტ/სთ. ჰიდროელექტროსადგური 2027 წლის 30 სექტემბრისთვის უნდა ამუშავდეს.