შსს-ს თანამშრომლების ნაცვლად, ქუთაისში ახალი საცხოვრებელი კორპუსი, დევნილებისთვის დასრულდება

ჯანდაცვის სამინისტროს დევნილთა, ეკომიგრანტთა და საარსებო წყაროებით უზრუნველყოფის სააგენტომ გამოაცხადა 14.6 მილიონი ლარის ღირებულების ტენდერი, რომლითაც უნდა დასრულდეს ჯერ კიდევ 2018 წელს დაწყებული და 2020 წელს შეჩერებული საცხოვრებელი კორპუსის მშენებლობა. პროექტი თავდაპირველად შსს-ს თანამშრომლების საცხოვრებელი სახლებით უზრუნველყოფისთვის 6.6 მილიონ ლარად შენდებოდა, თუმცა კონტრაქტორმა კომპანია "თი ემმა" აღნიშნული პროექტი ვერ განახორციელა, რის გამოც კონტრაქტი ნაადრევად, 2020 წლის ივნისში შეწყდა, აღნიშნული პერიოდისთვის უკვე გადახდილი იყო 2.6 მილიონი ლარი. ახალი საცხოვრებელი კომპლექსი ქუთაისში, ნიკეას 19-ში შენდება.

"აღნიშნულ მიწის ნაკვეთზე განთავსებულია რკინა-ბეტონის საცხოვრებელი დანიშნულების მშენებარე შენობა-ნაგებობა. პროექტი ითვალისწინებს ორი 11-სართულიანი საცხოვრებელი კორპუსის მშენებლობას, რომლიდანაც A ბლოკში დასრულებულია 7 სართულის მზიდი კონსტრუქცია, ხოლო B ბლოკში — 6 სართულის მზიდი კონსტრუქცია. ასევე დასრულებულია დახურული პარკინგისა და სათავსების რკინა-ბეტონის კონსტრუქციის მშენებლობა. შესყიდვის ფარგლებში გათვალისწინებულია არსებული პროექტის კორექტირება წინამდებარე ტექნიკური დავალების შესაბამისად, პროექტის შეთანხმება, მშენებლობის და სხვა ტიპის ნებართვების მოპოვება და მშენებლობის დასრულება"- ნათქვამია სატენდერო აღწერაში.

დევნილთა, ეკომიგრანტთა და საარსებო წყაროებით უზრუნველყოფის სააგენტოს ინფორმაციით, პროექტი 118 ბინას მოიცავს, აქედან 34 ერთოთახიანი; 68 ოროთახიანი; 16 კი სამოთახიანი იქნება.

კომპანიებს ტენდერში მონაწილეობის მიღება 18 ივნისამდე შეეძლებათ.