შვედეთი თანახმაა, NATO-მ ჰორმუზის სრუტის გახსნაში მონაწილეობა მიიღოს

შვედეთის საგარეო საქმეთა მინისტრმა, მარია მალმერ სტენერგარდმა POLITICO-სთან ინტერვიუში ჰორმუზის სრუტის გახსნის პროცესში NATO-ს შესაძლო ჩართულობის მხარდაჭერა გამოაცხადა.

როგორც მაღალჩინოსანმა თქვა, ჩრდილოატლანტიკური ალიანსის წევრი ქვეყნები დასახელებულ საკითხს ქალაქ ჰელსინგბორგში მიმდინარე მინისტერიალზე დეტალურად განიხილავენ. შვედეთის საგარეო უწყების ხელმძღვანელის განცხადებით, თავისუფალი საზღვაო მიმოსვლის დაცვა საერთაშორისო ვაჭრობისთვის ახლა ფუნდამენტურად მნიშვნელოვანია.

მინისტრის განმარტებით, ამჟამად ევროპის ინტერესებშია, რომ ირანმა ამ მარშრუტის იარაღად გამოყენება ვეღარ შეძლოს. აღსანიშნი ფაქტია, რომ NATO-ს ეგიდით სამხედრო მისიის დაწყების იდეას ნიდერლანდების საგარეო საქმეთა მინისტრი, ტომ ბერენდსენიც მიემხრო და ალიანსის შესაბამისი გამოცდილების გამოყენების აუცილებლობას ხაზი გაუსვა.

საყურადღებოა, რომ ალიანსის შიგნით ამ ინიციატივას ყველა წევრი ქვეყანა არ იზიარებს. საფრანგეთის საგარეო საქმეთა სამინისტროს წარმომადგენლის, პასკალ კონფავრეს განცხადებით, ჩრდილოატლანტიკური ხელშეკრულება მხოლოდ ჩრდილოატლანტიკურ რეგიონზე ვრცელდება. მისი შეფასებით, NATO ახლო აღმოსავლეთისა და ჰორმუზის სრუტის პრობლემებზე ფოკუსირებისთვის შესაფერისი ორგანიზაცია არ არის.

ანალიტიკოსები მიიჩნევენ, რომ ახალი სამხედრო მისიის დაწყება აშშ-ის პრეზიდენტისთვის, დონალდ ტრამპისთვის ალიანსის ფასეულობის ჩვენების კარგი შესაძლებლობა იქნებოდა. როგორც ცნობილია თეთრი სახლის ლიდერმა ბლოკის მისამართით უკმაყოფილება უკვე არაერთხელ გამოთქვა და დახმარების გაწევისაგან თავის შეკავების შემთხვევაში ქვეყნის ალიანსიდან გაყვანაც არ გამორიცხა.