"სოხუმი - სუჰუმი" - ოკუპირებულ აფხაზეთსა და განას შორის თანამშრომლობის შესახებ შეთანხმება გაფორმდა

დროებით ოკუპირებულ აფხაზეთს ვიზიტით ეწვია განის რესპუბლიკის სუჰუმის მუნიციპალური ოლქის დელეგაცია. ხელი მოეწერა შეთანხმებას აფხაზეთის დედაქალაქსა და განის რესპუბლიკის სუჰუმის მუნიციპალურ ოლქს შორის.

სოხუმის არაღიარებული ადმინისტრაციის ხელმძღვანელმა თიმურ აგრბამ აღნიშნა, რომ ეს არის მნიშვნელოვანი ნაბიჯი სახალხო დიპლომატიის განვითარებისა და დედაქალაქის საერთაშორისო თანამშრომლობის გეოგრაფიის გაფართოების საქმეში.

„ის ფაქტი, რომ შორეულ განას რესპუბლიკაში არსებობს მუნიციპალური ოლქი თანაჟღერადი სახელით სუჰუმი (Suhum), ამ პარტნიორობას სიმბოლურსა და უნიკალურს ხდის. ჩვენ ამ შეთანხმებაში ვხედავთ უზარმაზარ პოტენციალს სახალხო დიპლომატიის განვითარებისთვის. მანძილისა და კულტურული განსხვავებების მიუხედავად, ჩვენ გვაერთიანებს საერთო სწრაფვა საქალაქო გარემოს მოდერნიზაციისკენ, ადამიანების ცხოვრების ხარისხის გაუმჯობესებისა და საკუთარი თვითმყოფადობის შენარჩუნებისკენ. დარწმუნებული ვარ, რომ გამოცდილების გაზიარება ტურიზმის, კულტურული მემკვიდრეობისა და საქალაქო რესურსების მართვის სფეროში რეალურ ორივე მუნიციპალიტეტს სარგებელს მოუტანს და მყარ საფუძველს ჩაუყრის ხანგრძლივ, გულწრფელ მეგობრობას ჩვენს ხალხებს შორის“, – განაცხადა აგრბამ.

განას წარმომადგენელმა ფრანკ დანკომ აღნიშნა: „კონტინენტებით, კულტურებითა და ენებით დაშორებულნი, ჩვენ მაინც გაერთიანებულნი ვართ რაღაც მართლაც უჩვეულოთი - საერთო სახელითა და, მჯერა, საერთო ბედით. ბევრისთვის ასეთი დამთხვევა შეიძლება შემთხვევითობად ჩანდეს. ჩვენთვის კი ეს არის უნიკალური შესაძლებლობა მყარი პარტნიორობის ასაშენებლად, რომელიც გადაიზრდება გულწრფელ მეგობრობაში, ეკონომიკურ თანამშრომლობაში, ვაჭრობაში, ერთობლივ საგანმანათლებლო პროგრამებსა და ჩვენი ორი ხალხის კეთილდღეობაში“.

დანკოს თქმით, მყარი კულტურათაშორისი კავშირების ჩამოყალიბებას ხელს შეუწყობს განას სუჰუმის მუნიციპალურ ოლქში კულტურის ცენტრის გახსნა. „რათა მყარი საფუძველი ჩავუყაროთ ჩვენს ურთიერთობებს, გვსურს სამშობლოში შევქმნათ მეგობრობისა და კულტურის ცენტრი "სოხუმი - სუჰუმი". ეს სივრცე გახდება ჩვენი ჰუმანიტარული გაცვლის გული, სადაც განას მცხოვრებლები შეძლებენ უფრო ახლოს გაეცნონ აფხაზეთის ისტორიას, ტრადიციებსა და კულტურას, ასევე პლატფორმა ერთობლივი საგანმანათლებლო და საზოგადოებრივი პროექტების განვითარებისთვის“, - თქვა მან.