სომხეთი, ჩინეთი... - სად ყიდის საქართველო ბუნებრივ ქვებს?

ბოლო წლებში საქართველოდან ბუნებრივი ქვების ექსპორტი გააქტიურდა. გამორჩეული იყო 2024 წელი, როდესაც ექსპორტმა 415 ათასი აშშ დოლარი და 4 028 ტონა შეადგინა.

რაც შეეხება გასულ წელს, კირქვების (მარმარილო, კირქვიანი ტუფი, ეკაუსინი, კირქვის ფლუსი, კიროვანი ქვა) ექსპორტმა შედარებით იკლო და 264 ათასი დოლარი/2 913 ტონა შეადგინა.

ოფიციალური სტატისტიკით, 2023 წელს ექსპორტი ბევრად ნაკლები იყო - 83.9 ათასი დოლარის 937 ტონა, ხოლო 2022 წელს - 119 000 დოლარის ღირებულების 518 ტონა კირქვები გავიტანეთ უცხოეთში.

2026 წლის იანვარ-მარტში ექსპორტი 36.6 ათასი დოლარი/633 ტონაა. ეს ნაკლებია 2025 წლის პირველი კვარტალის მაჩვენებელზე - 52.5 ათასი დოლარი/757 ტონა.

2025 წლის მონაცემებით, მთავარი საექსპორტო ბაზარი სომხეთია, სადაც გასულ წელს 101.7 ათასი დოლარის 1 925 ტონა პროდუქტი გაიყიდა. მეორე ადგილზეა ჩინეთი 72.6 ათასი დოლარით და 647 ტონით, რომელსაც მოსდევს ინდოეთი 70.4 ათასი დოლარით და 251 ტონა. მცირე ექსპორტი ხორციელდება იტალიაში ($8.5 ათასი/54 ტონა), აზერბაიჯანში($2.8 ათასი/23 ტონა) და საბერძნეთშიც ($8 ათასი/12.5 ტონა).

საექსპორტო გეოგრაფიაში გარკვეული გადალაგება შეინიშნება, რადგან 2024 წელს ქართული ბუნებრივი ქვის მთავარი საექსპორტო ბაზარი ჩინეთი იყო, სადაც 333 000 დოლარის 2 544 ტონა საქონელი გავიდა. მეორე ადგილს კი სომხეთი იკავებდა, სადაც 63 000 დოლარის 1407 ტონა კირქვის ფლუსი და კიროვანი ქვა გავიდა. ხოლო მესამეზე - იტალია იყო 11 180 დოლარის 76 ტონა ბუნებრივი ქვის ექსპორტით.

2023 წლის მონაცემების თანახმად კი, საექსპორტო ბაზრებს შორის პირველზე სომხეთი, შემდეგ კი ისრაელი, საბერძნეთი და საუდის არაბეთი იყო.